भांगरभूंय | प्रतिनिधी
कृष्णा साळकारः किरकोळ नुस्त्या मार्केटाच्या नुतनीकरणाचो धाडटले प्रस्ताव
भांगरभूंय । प्रतिनिधी
मडगांवः एसजीपीडीए ठोक नुस्त्यां मार्केटाची सोपो निविदा जून अखेर मेरेन काडटले. तशेंच एसजीपीडीए लागसारच्या मेकळ्या सुवातांचेर पे पार्कींग करतले. ते खातीर दर थारायतले. मार्केटाचे नितळसाणीची जापसालदारकी पालिकेची आसा. ते संबंदांत तांचे कडेन चर्चा करतले. तशेंच किरकोळ मार्केटीचेंय नुतनीकरण करतले आनी ते उपरांत करांत वाड करतले, अशी म्हायती एसजीपीडीए अध्यक्ष कृष्णा साळकार हांणी दिली.
एसजीपीडीएची म्हयनाळी बसका बुधवारा सकाळी एसजीपीडीएच्या कार्यालयांत जाली. ह्या वेळार साळकार हांचे सयत आमदार विजय सरदेसाय, आमदार दिगंबर कामत तशेंच हेर वांगडी हाजीर आशिल्ले.
बसके उपरांत साळकार हांणी सांगलें, ठोक नुस्त्यां मार्केटांत येवपी गाडयांचेर दर थारायिल्ले. त्या वेळार आठ आनी धा टायरांच्या व्हड ट्रेलर्साचे दर थारावंक नाशिल्ले. ताका लागून गोंदळ जाल्लो आनी पुलिसांक मध्यस्ती करची पडिल्ली. आतां आठ टायरांच्या गाडयांक 800 आनी धा टायरांच्या गाडयां खातीर 1 हजार रुपया कर घेवपाचें थारायलां. मार्केट हें नुस्तें विक्रेत्यांक सोयी खातीर आशिल्ल्यान नुस्तें विक्रेते, परंपरीक नुस्तें विक्रेते अश्या सगळ्यांक विस्वासांत घेतले आनी फुडलो निर्णय घेतले.
एसजीपीडजीए कार्यालयाचे कुशीक मेकळी सुवात आसा. थंय फेस्त जाले उपरांत थंय पे पार्कींग करपाचो निर्णय घेतला. ते खातीर दर थारावपाच्या कामाची प्रक्रिया सुरू केल्या. एसजीपीडीए किरकोळ मार्केटाची स्थिती सामकी वायट जाल्या. थंय नुस्तें विक्रेत्यां कडल्यान 10 रुपया कर घेतात. तातूंत देखभालीचो खर्च सुटना. ताका लागून दोन दिसांनी गोंय सरकारा कडेन किरकोळ नुस्तें मार्केटाच्या नुतनीकरणाचो प्रस्ताव धाडटले. ताका मंजुरी मेळ्ळे उपरांत मार्केटाचें नुतनीकरण करून सगळ्यो सुविधा उपलब्ध करून ते उपरांत मार्केट विक्रेत्यांच्या करांत वाड करतले, अशें साळकार हांणी सांगलें. ठोक मार्केटाचे सुवातेर घाणयाऱ्या उदकाचेर प्रक्रिया करपी प्रकल्प आशिल्लो, पूण तो सुरू ना. तशेंच किरकोळ नुस्तें मार्केटांत घाणयाऱ्या उदकाचेर प्रक्रिया करपी प्रकल्पूच ना. हे संबंदांत वांगडी सचिवा कडेन चर्चा करून उपाय येवजण करतले, अशीय म्हायती साळकार हांणी दिली.
जानेवारी मेरेन मार्केटाचें स्थलांतरः साळकार
नुस्त्या मार्केटाचे इमारतीचें काम जीएसआयडीसी कडल्यान करतात. तांणी पुराय सुवातेचो ताबो मेळ्ळ्यार काम बेगीन करून दितले, अशें सांगिल्लें. मात, नुस्तें विक्रेत्यांक वेर्णेची सुवात मान्य ना. मुख्यमंत्री डॉ. प्रमोद सावंत हांचे हाजिरेंत फुडल्या सप्तकांत बसका आयोजीत केल्या. त्या वेळार ताचेर उपाय काडटले. डिसेंबर ते जानेवारी मेरेन मार्केट स्थलांतर करपाचो विचार आसा, अशें कृष्णा साळकार हांणी सांगलें.
सोपो कर निविदेंतल्यो अटी सदळ
एसजीपीडीए कडल्यान ठोक नुस्त्या मार्केटाची सोपो कर निविदा हे आदीं जारी केल्ली. पूण तातूंत कंत्राटदार हो नुस्तें उद्देगांतलो आसचो आनी ताका तीन वर्सांचो अणभव आसचो, अश्यो अटी आशिल्ल्यो. सोपो निविदेंतल्यो ह्यो अटी आतां सदळ केल्यात. विधानसभा अधिवेशना आदीं निविदा जारी करतले, अशें कृष्णा साळकार हांणी स्पश्ट केलें.
‘कोयर काडपाची जापसालदारकी पालिकेची’
एसजीपीडीएंतलो कोयर काडपाची जापसालदारकी ही मडगांव पालिकेची आसा, एसजीपीडीएची न्हय. कांय वेळार ट्रक उपलब्ध नासप वा हेर तांत्रीक कारणा खातीर पालिका कोयर उखलिनात. ते संबंदांत दोनूय आमदारां कडेन चर्चा केल्या. ते मुख्याधिकाऱ्यां कडेन चर्चा करून हो विशय सोडयतले, अशें एसजीपीडीएंतल्या कोयरा विशीं उलयतना अध्यक्ष कृष्णा साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
