भांगरभूंय | प्रतिनिधी
पणजी, प्रतिनिधीः ड्युरालायन इंडिया कंपनीच्या 46 कामगारांक कामा वयल्यान काडिल्ले प्रकरण दक्षीण गोंय कामगार उप आयुक्ता कडेन पावलें. आयज दनपरां ताचेर सुनावणी जातली, अशी म्हायती कामगार आयुक्त लेव्हीन्सन मार्टिन्स हांणी ‘भांगरभूंय’क दिली.
वेर्णेच्या ड्युरालायन इंडीया प्रायव्हेट लिमिटेड कंपनीच्या 46 कामगारांक अचकीत काडून उडयल्ल्यान कामगारांनी आझाद मैदानाचेर आंदोलन करीत तांकां परतून कामार घेवपाची मागणी केल्ली.
20 ते 25 वर्सा नोकरी केल्ल्या कामगारांक ड्युरालायन कंपनीन काडून उडयल्या. कंपनीची स्थिती बरी आसा आनी कामय नेटान चलता तरी लेगीत कंपनीन कायमस्वरुपी आशिल्ल्या 46 कामगारांक 31 मार्चांक काडून उडयल्यात, असो आरोप कामगारांनी केल्लो.
हे विंशी कामगार आयुक्त लेव्हीनसन मार्टीन्स हांका विचारल्यार तांणी सांगले की हो विशय दक्षीण गोंयचे कामगार उप आयुक्ता मुखार मांडला. आयज दनपरां 3.00 वरांचेर हे प्रकरणाचेर सुनावणी जातली.
हे सुनावणेत विचारविनमय जावन फुडली प्रक्रिया चालिक लागतली. हो विशय कामागर संघटना आनी उप कामागार आयुक्त हांचे मदी आसा. ही सगळी कायदेशीर प्रक्रिया जावन आसा, अशें मार्टीन्स हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
