भांगरभूंय | प्रतिनिधी
म्हापशें, प्रतिनिधी ः बागा- कळंगुटे बुलेट मोटरसायकलीचो सायकलीक धपको बसून जाल्ल्या अपघातात दुचाकीस्वार अनोस भीम गुरंग (19, कांदोळी, मूळ नेपाळ) हाका मरण आयलें. जाल्यार दीपल (40) हो सायकल चलोवपी जखमी जालो.
चड म्हायती प्रमाण, सोमारा 17 तारखेक सकाळीं सुमार 6.30 वरांचेर बागा पार्किंगाच्या फाटल्यान आशिल्ल्या टी जंक्शनाचेर हो अपघात जालो. मरण आयिल्लो अनोस गुरंग हो जीए 03 एजी 4004 क्रमांकाच्या बुलेट मोटारसायकली वयल्यान हेमराज क्लबा वटेन वतालो.
टी जंक्शनाचेर पावतकच बुलेटीन सायकलीक धपको दिलो. ह्या अपघातांत दुचाकीस्वार अनोस हो बुलेटी वयल्यान उसळून रस्त्यार पडलो आनी गंभीर जखमी जालो. उपरांत ताका एम्ब्युलन्सांतल्यान म्हापशें जिल्लो हॉस्पिटलांत दाखल केलो, तेन्ना दोतोरांनी ताका मरण आयिल्ल्याचे सांगलें. जाल्यार सायकल चलोवपी दिपव गंभीर जखमी जालो. ताचेर जीएमसीत उपचार सुरू आसात. दीपल हो बेघर आसून तो बागा हांगा रावता आनी हमालीचें काम करता. अनोस गुरंग हो इव्हेंट मॅनेजमेंट कंपनींत काम करतालो.
कळंगूटे पुलीस उपनिरिक्षक व्ही. धवळीकार आनी हवालदार प्रशांत चोपडेकार हांणी अपघाताचो पंचनामो करून मरण आयिल्ल्या दुचाकीस्वारा आड गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
