इंग्लंडांतल्या मतदारांक ‘एआय खासदार’ वेंचपाची संद

भांगरभूंय | प्रतिनिधी

लंडन, खबरां संस्था : फुडल्या म्हयन्यांत जेन्ना मतदार एका इंग्लीश शारांत मतदानाक वतले तेन्ना तांकां संवसारांतल्या पयल्या ‘एआय खासदार’ वेंचपाची संद मेळटली.
ब्रिटनांत 4 जुलयाक जावपी राष्ट्रीय वेंचणुकेंत संसदेचे वांगडी जावपाक उबे आशिल्ल्या शेंकड्यांनी उमेदवारां मदीं वेवसायीक स्टीव एन्डाकोट आसात – मात तांच्या प्रचार पत्रकाचेर ह्या 59 वर्सांच्या उमेदवाराचें मुखामळ न्हय, तर एआय अवतार दिसता. म्हणल्यार एन्डाकोटा बदला हो एआय वेंचणूक लढयतलो. ‘स्मार्टर युके’ ह्या एन्डाकोटाच्या पक्षाची नोंदणी जावंक नाशिल्ल्यान एआय स्टीव्ह हो अपक्ष म्हूण वेंचणूक लढयतलो.
आमी एक पार्टी सुरू करतात, हे वेंचणुके उपरांत देशभरांत आनीक एआय उमेदवार भरती करपाचे आसात आनी हें आमी कितें तरी व्हडलें आनी लोकशायवादी सुरू करतात, अशें एन्डाकोट हांणी ‘रॉयटर्स’ खबरां संस्थेक सांगलें.
स्टीव्ह एन्डाकोट हांचे न्यूरल व्हॉयस कंपनीन हो एआय तयार केला. एन्डाकोटान सांगलें, ‘स्टॅण्डर्ड पाॅलिटिक्सा’ विशीं आशिल्ली निरशेणेक लागून दक्षीण दर्यादेगेवेल्या ब्रायटन पॅव्हिलियन मतदारसंघा खातीर अपक्ष म्हणून वेंचणूक लढोवपाचें आपणें थारायलें.
‘ए. आय. स्टीव’ – अशें नांव मतपत्रिकांचेर दिसतलें. एलजीबीटीक्यू हक्क आनी घरां ते कोयर एकठांय करप आनी इमिग्रेशन मेरेनच्या विशयांचेर थळाव्या लोकां कडेन स्टीव भासाभास करता. उपरांत तांच्यो सुचोवण्यो विचारचे पयलीं धोरणात्मक विचार मुखार दवरता.
‘आमी कामाचेर, समाजीक संवादांत एआय वापरतात, राजकारणांत कित्याक तांकां संद दिनात?’ ब्रायटन धक्या लागसार ‘ए. आय. स्टीव’ हांकां मेळ्ळ्या उपरांत 23 वर्सां पिरायेची धर्मादाय कामगार इओना जॉन्सन हांणी सांगलें. ‘हे गजालीक लागून आमची जियेवपाची पद्दत बदलूं येता.’
चडशे थळावे लोक एआय उमेदवाराक मत दिवपाक आडखळटात अशें दिसता. एआय स्टीव्ह वेंचणूक जिखलो जाल्यार स्टीव्ह एन्डाकोट हेच खासदार जातले, तांची एआय आवृत्ती न्हय, अशें वेंचणूक आयोगान सांगलें.
ब्रायटनचो 37 वर्सां पिरायेचो अकावंटंट जिम चीक हाणें संसदेंत मतदारां वतीन एका खासदाराक उलोवचें पडटा ,अशें नदरेक हाडलें.
एआय आनी राजकारण्यां मदीं एकूच गजाल समान आसा, अशें आनीक एक थळावो रहिवासी अँडी क्लॉसन (42) हाणें सांगलें. ‘ती गजाल म्हणल्यार तांचेर विस्वास दवरूंक मेळना.’