भांगरभूंय | प्रतिनिधी
मक्का, खबरां संस्था : सावदी अरेबिया सयत मध्य- उदेंत आशियेंत उश्णतायेचें ल्हार पातळ्ळां. मजगतीं, हज यात्रेचेरूय (मक्का, सावदी अरेबिया) उश्णतायेचो व्हड परिणाम जाला. उश्णतायेक लागून 550 हज यात्रेकरुंक मरण आयलां. मरण आयिल्ल्या लोकां मदीं 323 भक्त इजिप्ताचे नागरीक आसात. भितरल्या एकल्याक गर्देक लागून मरण आयलां, अशें सावदींतल्या एका वरिश्ठ अधिकाऱ्यान सांगलें.
इस्लामांत हज यात्रेक खाशेलें म्हत्व आसा. दरेक मुसलमानान जिवितांत एक फावट तरी हज करचो अशें म्हण्टात. देखून संवसारभर लाखांनी मुसलमान दर दिसा हज यात्रेक मक्काक वतात. मजगतीं, सावदी हवामान खात्याच्या म्हणण्या प्रमाण हवामानांतल्या बदलाचो थंयच्या वातावरणाचेर गंभीर परिणाम जावपाक लागला. मक्काचें सरासरी तापमान 0.4 अंश वाडत आसा. सावदी राष्ट्रीय हवामान विज्ञान केंद्राच्या म्हणण्या प्रमाण सोमारा मक्का हांगाचे व्हडले मशिदी लागसार 51.8 अंश सेल्सियस तापमान नोंद जालां.
हज खातीर आयिल्ल्या 2700 परस चड यात्रेकरुंची भलायकी इबाडल्या आनी लागसारच्या हॉस्पिटलांनी तांचेर उपचार सुरू आसात. थळाव्या माध्यमांनी मरण आयिल्ल्यांचो आंकडो वाडूंक शकता अशें सांगलां. रांकेंत उबे रावून यात्रेकरु स्वताचे तकलेर उदक ओततात हें चित्र थंय दिसता. थंयचे स्वयंसेवक यात्रेकरुंक उदक, थंड पेयां, आइसक्रीम दिताले, जाका लागून यात्रेकरुंक उश्णतायेचो त्रास जावचो न्हय.
हज वेवस्थापन समितीन भक्तांक सत्री वापरपाची सुचोवणी केल्या. तशेंच भरपूर उदक पियेयात, दनपरां भायर सरूं नाकात असो सल्लो दिला.
शेनवारा अराफात पर्वताचेर नमाज आनी जायते हज विधी खातीर यात्रेकरुंक दनपरां वतांत रावचें पडिल्लें. भक्त वराचीं वरां थंय उबे राविल्ले. ताका लागून जायत्या जाणांची भलायकी इबाडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
