भांगरभूंय | प्रतिनिधी
आदल्या नगरसेवकाचें पालिका मुख्याधिकाऱ्यांक निवेदन
म्हापशें: विठ्ठलवाडी, अन्साभाट म्हापश्यां नगरपालिकेच्या मालकीचें भौशीक शौचालय बेकायदो रितीन मातयेभरवण करपी जेसीबी आनी म्हालवाहू रिक्षा जप्त करपा सयत संबंदितांचेर कारवाय करची अशी मागणी आदले नगरसेवक तुषार टोपले हांणी केल्या.
हे संबंदी पालिका मुख्याधिकाऱ्यांक टोपले हांणी कागाळवजा निवेदन सादर केलां. ह्या निवेदनाच्यो प्रती मुख्यमंत्री डॉ. प्रमोद सावंत, नगरविकास मंत्री विश्वजीत राणे, मुखेल सचीव पुनीत कुमार, नगरपालिका संचालक ब्रिजेश मणेरकार, थळावे आमदार आनी उपसभापती ज्योशुआ डिसोझा आनी नगराध्यक्ष डॉ. नूतन बिचोलकार हांकां धाडून दिल्यात.
हें बेकायदो कृती करपाक कारण थारिल्ल्या लोकांचेर कारवाय करपाक कळाव जाल्यार भौशीक सेवकां कडल्यान कर्तव्य न बजावप आनी दोशींक राखण दिवप आनी भौशीक हिता कडेन तडजोड केल्ले खातीर उच्च न्यायालयांत याचिका दाखल करतले अशी शिटकावणीय टोपले हांणी ह्या निवेदनांतल्यान दिल्या.
फाटल्या 15 जून दिसा सांजवेळा 4 ते 5 ह्या वेळांत विठ्ठलवाडी हांगासरल्या म्हापशें पालिकेचें भौशीक शौचालय अनवळखी मनशांनी जेसीबीच्या आदारान मातयेभरण केल्लें.
नगरपालिकेच्या मालमत्तेचे मुख्याधिकारी आनी पालिका अभियंतो हे स्टोडियन अधिकारी आसात. ह्या मालमत्तेची देखभाल करपाचें कर्तव्य तांचें आसा. कोणतरी अनवळखी मनीस पीटी शीट क्रमांक 122 आनी चलता क्रमांक 219 मदल्या म्हापशें पालिकेच्या मालकीचें प्रभाग 10 मदलें भौशीक शौचालय जेसीबी आनी म्हालवाहू रिक्षेचो वापर करून मोडून उडयिल्लें अशें निवेदनांत टोपले हांणी म्हणलां.
ह्या प्रकरणांत नगरपालिकेन पुलीस कागाळ करून पुलिसां वतीन चवकशी करची. भौशीक मालमत्तेचें लुकसाण आनी नासधूस करपी अशा बेकायदो कृत्यांत वांटेकार आशिल्ल्या मनशांचेर गुन्यांव नोंद करचो. गुन्यांवांत वापरिल्लें वाहन जप्त करचें आनी दुबावितां कडल्यान संररचनेची किंमत वसूल करची अशी मागणीय टोपले हांणी ह्या निवेदनांतल्यान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
