भांगरभूंय | प्रतिनिधी
मॅचीच्या पुर्वार्धांत ज्यूड बेलिंगहॅमान हेडरा वरवीं केल्ल्या गोला नेटार इंग्लंडान युरो करंड फुटबॉल सर्तीच्या क गटांतले मॅचींत सर्बिया पंगडाक 1-0 अशा निसट्ट्या फरकान हारयलो.
इंग्लंडान ह्या जैतान क गटांतली पयली सुवात मेळयली. क गटांतले आनीक एके मॅचींत स्लोव्हेनियान एका गोलान फाटीं पडून लेगीत अखेरेक डॅनमार्काक 1-1 असो बरोबरींत आडावपाक येस मेळयलें. 17व्या मिनटाक क्रिस्तियन एरिक्सनान डॅनमार्का वतीन गोल केल्या उपरांत एरिक यान्झान 77व्या मिनटाक स्लोव्हेनियाक बरोबरी सादून दिली.
युरो करंड फुटबॉल सर्तींत इंग्लंडा वतीन गोल करपी हेलिंगहॅम तिसरो युवा फुटबॉलर थारलो. तो 20 वर्सां 353 वर्सांचो आसा.
दुसऱ्या अर्दांत सर्बियान खर प्रतिकार करून इंग्लंडाचेर चेपण हाडलें. पूण, ताका गोल करपाक जमलो ना.
फ्रान्साचो एम्बाप्पे जखमी
फ्रान्साचो स्टार स्ट्रायकर किलीयन एम्बाप्पेच्या नाकाक दुखापत जाली. ताका लागून एम्बाप्पेक गट पांवड्या वयल्यो उरिल्ल्यो मॅची चुकतल्यो. एम्बाप्पेक फ्रान्साचे पयले मॅचींत ही दुखापत जाली. ड गटांत ऑस्ट्रिया आडचे मॅचीच्या दुसऱ्या अर्दांत ताच्या नाकाक ही दुखापत जाली. फ्रान्सान ही मॅच 1-0 फरकान जिखिल्ली.
एम्बाप्पेक ऑपरेशन करपाची गरज ना. पूण, ताका कांय दीस विसव घेवपाचो सल्लो दोतोरांनी दिला. परतून नाकाक दुखापत जावची न्हय. म्हणून प्रॉटेक्टेड शिल्ड वापरचें पडटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
