भांगरभूंय | प्रतिनिधी
संवसारीक टी-20 क्रिकेट सर्तीतले निमाणे सांखळी मॅचींत येजमान वॅस्ट इंडीज पंगडान अफगाणिस्तानाक 104 अशा व्हडा फरकान हारयलो. पयलीं बॅटींग करतना वॅस्ट इंडीजान निर्धारीत 20 ओव्हरींनी 218 धांवड्यांचो दोंगर उबारलो. प्रत्युत्तर दितना अफगाणिस्तानाचो डाव 16.2 ओव्हरींनी 114चेर सोंपलो. आंतरराष्ट्रीय टी-20 क्रिकेटींतलो धांवड्यांच्या फरकान वॅस्ट इंडीजान मेळयिल्लें हें दुसरें व्हड जैत थारलें.
अफगाणिस्तानाचो मुखेली राशीद खानान टॉस जिखून पयलीं वॅस्ट इंडिजाक बॅटींग करपाचें आमंत्रण दिलें. ताचो हो निर्णय सामको चुकीचो थारलो. 22 धांवड्यांचेर विंडीजाक पयलो धपको बसलो. पूण, ते उपरांत जॉन्सन चार्ल्स आनी निकोलस पुरन हांणी दुसरे विकेटी खातीर जबरदस्त भागिदारी केली. जॉन्सनान 27 बॉलांनी आठ चवक्यांचे मजतीन 43 धांवड्यो केल्यो.
निकोलस पुरनान लेगीत आक्रमक बॅटींग केली. ताणें 53 बॉलांनी स चवके आनी आठ सक्यांचे मजतीन 98 धांवड्यो केल्यो. आंतरराष्ट्रीय टी-20 क्रिकेटींतलो पुरनाचो हो सर्वोच्च स्कोर थारलो. ताका दोन धांवड्यांनी शेंकडो चुकलो.
मोखीचो फाटलाव करपाक मैदानांत देंवपी अफगाणिस्तान ही मॅच जिखतलो अशें एकदा दिसूंक ना. ताका व्हड धपको पयलेच ओव्हरींत बसलो. ओपनर रहमानउल्ला गुरबाजाक खातें लेगीत उगडपाक जमलें ना. धांवड्यांचो फाटलाव करपाची जापसालदारकी गुरबाजाचेर आशिल्ली.
तो बाद जाल्या उपरांत मॅच वॅस्ट इंडीजा वटेन घुंवली. इब्राहीम झद्रानान 28 बॉलांनी 38 धांवड्यो केल्यो खऱ्यो. पूण, हेर बॅट्समनां कडल्यान ताक योग्य अशी साथ मेळूंक ना. ताचो डाव 114चे सोंपलो. ओबेद मॅकॉयान 3 ओव्हरींनी 14 धांवड्यो दिवन 3 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
