भांगरभूंय | प्रतिनिधी
गॅरंटी हें उतर आयकलें म्हणजे म्हाका गॅरंटीची याद जाता. ही गॅरंटी खंयच्या वस्तीची बी न्ही. हें एका मनशाचें नांव. कांय वर्सां पयलीं हांव काणकोणां कामाक आसलों तेन्ना ह्या मनशाक मेळिल्लों. काणकोणच्या एका रेस्टॉरंटांत गॅरंटी वेटराचें काम करतालो. सुरवेक गॅरंटीक कोणेय उलो मारलो म्हणजे हांव अजापतालों. असलें म्हणून नांव आसूंक शकता? उपरांत ह्या नांवांची सवंय जाली. तशें ताचें नांव दुसरें कितेंतरी आसूंक जाय पूण एकदां गॅरंटी हें नांव चिकटलें आनी बाकीचे लोक कित्याक स्वता गॅरंटी लेगीत आपणांक पाळण्यांत घालतना एक नांव दवरिल्लें हें विसरून गेलो आसूंक जाय. ताका खर्या नांवांन कोणेय उलो मारल्यार तो आपूण म्हणपाचें कळचेंय नासलें. तसो गॅरंटी गॅरेंटेड मनीस. कामावेळार नाच जावपी आनी विचारल्यार व्हाळार गेल्लों वा विडी वोडूंक गेल्लों नाच जाल्यार भायरूच आसलों, कोणतरी मेळ्ळो ताचे कडेन उलोवंक बसलों असलेंच कितेंतरी सांगतालो.
आतां हें गॅरंटी नांव ताच्या वागणुकेक लागुनूच ताका मेळिल्लें. पयलीं खंय तो एके बस कंपनींत किलींडर म्हणून कामाक आसलो. हे कंपनीच्यो बसी गोंयांभायर वचपी. म्हणटकूच हेर कर्मचार्यां वांगडा एक आलायतो मनीस तांकां जायच आसतालो. वाटेर कोणाचेंय सामान चडय, कोणूय मदींच देंवता जाल्यार ताचें सामान देंवय हें करूंक एका किलींडराची गरज पडटालीच. ते भायर प्रवास रातचो म्हणटकूच वेळा प्रसंगाक टायर काड, पाने हाड, मुखावेल्या हारशार उदक मार करुंक कोणतरी जायच आसतालो. गॅरंटीन हांगा जाय तेन्नाच कूस मारून तांची धांदळ उडोवची. आज आसा मरे तूं काय नाच जातलो? अशें विचारल्यार कांयच भियेवं नाकात म्हजी सामकी गॅरंटी धरात म्हूण सांगचें आनी ऐनत्या वेळार नाच जावचें. हाकाच लागून ताचें नांवूच गॅरंटी पडलें. ताचे हे गॅरंटीक कंटाळून बस कंपनीन ताका कामावेल्यान काडलो.
एकदां नांव पिड्ड्यार जातकूच मागीर कोण कामार घेतलो? तातूंत ताची ही गॅरंटी सगळ्याक फामाद जाल्ली. बसीचें जायतें मॅकानीकपण जाणा जावनूय खंयचोच बस मालक ताका कामार घेना जालो आनी गॅरंटीचेर रेस्टॅरंटांत वेटराचें काम करपाची पाळी आयली. आतां किलींडर जालो वा वेटर सभाव खंय वतलो? हांगाय गॅरंटीन आपली गॅरंटी दिवची आनी दोन दोन दीस कामावेल्यान नाच जावचो. आतां गॅरंटी खंय आसा खबर ना पूण जेन्ना कोणूय गॅरंटी दिता तेन्ना ह्या गॅरंटीची याद जाले बगर रावना. सद्याक ताची याद जावपाचें कारण म्हणल्यार पयरूच जाल्ली लोकसभेची वेंचणूक.
अंदुची लोकसभेची वेंचणूक गाजली ती गॅरंटीक लागून म्हणची पडटली. एके वटेन मोदीची गॅरंटी तर दुसरेवटेन इंडीची गॅरंटी. टिव्ही लाय गॅरंटी, कोणाकूय फोन लावंक चल, रींग वाचचे जाग्यार पयलीं गॅरंटी. सामको वाज हाडलो हे गॅरंटीन. वेंचणूक सोंपली आनी वांगडाच गॅरंटीय सोंपली आसूंक जाय. तशी गॅरंटी म्हणटात ती खिणभराचीच आसता. तुमी थंयच्यान फाट फिरायली म्हणजे गॅरंटी सोंपता. देखीक तुमी कसलीय गजाल घेवंक वचात, टिव्ही धरून गाडी मेरेन. तुमी ती गजाल घे मेरेन वितरक तुमकां गॅरंटी दितलो. आयकतल्याक दिसप हो सामको घरा येवन जाय तशी शिर्विस दितलो. पूण एकदां तुमी दिल्लो चेक वाटावलो म्हणजे जालें. सोंपली गॅरंटी. तो तुमचो फोन लेगीत उखलूंक कठीण.
आमचे कडेन ते वस्तुचें बील आसता, कंपनीचें कार्ड आसता, ताचेर सगळ्या अटींसयत गॅरंटी दिल्ली आसता. हें सगळें आसुनूय दिल्ली गॅरंटी मेळप कठीण आसता. आनी ते गॅवंटी खातीर आमकां कंज्युमरांत वचून झगडचें पडटा. न्याय मेळूंक कितलो वेळ लागत सांगूंक जावचें ना. आनी हांगा तर सगळेंच तोंडी. मागीर कशी मेळटली गॅरंटी? तातूंत आमी अमक्याकूच मत दिलां हाचो पुरावो कसो दिवपाचो? आनी आमी मत दिल्लो वेंचून आयलोना तर? मतूय गॅलें आनी गॅरंटीय गेली. आनी वेंचून आयलो म्हणून कितें दिल्ली गॅरंटी पाळटलो हाची खात्री आसा? हांगा तर कंज्युमरानतूय वचूंक मेळणा. मागीर कितें करपाचें? नवी वेंचणूक जायसर तोंड धांपून बसपाचें. तशें हाचे पयलींच्या गॅरंटींचें कितें जालें म्हणून ह्या गॅरंटीक आमी पातयेवपाचें? वेंचून आयल्यार कांय दिसां भितरूच स्वीस बँकांतले पयशे परते हाडटले? हाडले? ना. दर वर्सा कितल्या तरी लाख भुरग्यांक नोकर्यो दितले. दिल्यो? ना. पांच वर्सां भितर शेतकारांचें उत्पन्न डबल जातलें. जालें? शेतकार रस्त्यार कित्याक बसल्यात? देशांतली गरिबी ना करतले? केली काय वाडयली?
कित्याक हें सगळें करूंक पावले नात हाची जाप दिली कोणे? ना. तांकां खबर आसा लोक रोखडेच विसरतात. हेंय विसरल्या आसतले. तातूंत मतदाना दिसा मतदाराच्या हातार कितेंय उडयलें म्हणजे मतदार खोशी जातात हेंय तांकां खबर आसा. देखून मतदारांक गृहीत धरून ते वागतात. पूण सदांकाळ हें चलचेंना हेंय मतींत दवरपाची गरज आसता. मतदार केन्नातरी जागो जाता आनी आपणाली करामत दाखयता. गरिबी हटाव, गरिबी हटाव घोशणा दीत काँग्रेसीन कितलीं तरी वर्सां लोकांक पिशे केले. गरिबी काय ना जालिना, वेल्यान वाडली. लोक समजुपाचें ते समजले आनी दुसर्याक संद दिली. हो तरी कितेंय बरें करतलो अशीच लोकांची समजूत आसली. पूण लोकांच्या मनासारकें जालें? फकत गॅरंटी दिवन पोटां भरनात हें समजुपाची गरज आसा.‘ मोदी का वादा’ वा ‘मोदीची गॅरंटी’ ही बोलाचीच कढी आनी बोलाचाच भात हें लोकांक कळ्ळां म्हणपाचें ह्या राजकारण्यांक बेगीन कळ्ळ्यार पुरो. नासल्यार काँग्रेसीचें जालां तेंच भाजपाचें जावंक वेळ लागचो ना.
अभयकुमार वेलिंगकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
