भांगरभूंय | प्रतिनिधी
वास्को, प्रतिनिधी: सांकवाळे पंचायतींतल्या दोन प्रभागांत नियोजीत मेगा हाऊसिंग प्रकल्पाक थळाव्यांचो विरोध आसा. हे विशीं थळाव्यांनी कुठ्ठाळेचे आमदार आंतोन वाझ हांकां निवेदन दिलां. हे विशीं आमदार वाझ हांणी लक्ष घालचें अशी मागणी ह्या वेळार केली. हे विशीं दखल घेतना आमदार वाझ हांणी ह्या प्रकल्प जाग्याक भेट दिवन पळोवणी केली.
ह्या प्रकल्पाक पंचायतीन दोन-तीन म्हयन्यां आदीं बांदकाम परवानो दिला. तशेंच ह्या प्रकल्पाक हेर खुबश्या संबंदीत खात्यांचे परवाने मेळूंक नासतना पंचायतीन हो परवानो कित्याक दिला हे विशीं फाटले ग्रामसभेंत थळाव्यांनी प्रस्न केल्लो. ह्या मेगा प्रकल्पाक लागून उदक, वीज आनी हेर गजालींचेर व्हड परिणाम जावपाची तशेंच कोयराचो विलो लावपाचो प्रस्न निर्माण जावपाचो भंय उक्तायल्लो. ह्या प्रकल्पाक मुरगांव नियोजन आनी उदरगत प्राधिकरण, टिसीपीचे परवाने मेळिल्ल्यान आमी कांयच करपाक शकनात अशें पंचायतीचें म्हणणें आसा. ह्या प्रकल्पाक फाटल्या धा वर्सां सावन विरोध जाता. तशेंच आतां ह्या प्रकल्पा खातीर सांकवाळे पंचायतीन बांधकाम परवानो दिल्ल्यान थळावे तिडकल्यात. तांणी ह्या प्रकल्पाक आमचो विरोध आशिल्ल्यान तो पुरायेन बंद उडोवचो अशी मागणी केल्या.
हे विशीं प्रभाग दोनच्या लोकांनी सोमारा आमदार वाझ हांची भेट घेवन निवेदन दिलें. तशेंच तांचे मुखार ह्या प्रकल्पाक लागून फुडाराक येवपी समस्यांची म्हायती दिली. ह्या प्रकल्पाक मुरगांव नियोजन आनी विकास प्राधिकरण, टीसीपी तशेंच सांकवाळे पंचायतीन दिल्ले विवीध परवाने फाटीं घेवचे खातीर केल्ल्या पत्राचीय म्हायती दिली.हीं यंत्रणां कांय हालचाल करिना हेंय स्पश्ट केलें. आमदार वाझ हांणी हो प्रस्न मुख्यमंत्री डॉ. प्रमोद सावंत हांचे मुखार व्हरपाचे यत्न करपाची मागणी थळाव्यांनी केली.
हे विशीं आपूण योग्य तें लक्ष घालतलो, अशें आमदार वाझ हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
