भांगरभूंय | प्रतिनिधी
पणजी: राज्यपाल पी. एस. श्रीधरन पिल्लय हांणी गोंयच्या लोकांक आनी खास करून सुटके झुजारी भावां- भयणांक गोंय क्रांती दिसाचीं परबीं भेटयल्या. राज्यपाल संदेशांत म्हणटा, १८ जुनाच्या गोंय क्रांती दिसाच्या इतिहासीक प्रसंगार हांव गोंयच्या लोकांक आनी खास करून सुटके झुजारी भावां-भयणांक म्हजी उर्बेभरीत परबीं भेटयतां.
मुख्यमंत्र्यान भेटयलीं परबीं
मुख्यमंत्री डॉ. प्रमोद सावंत हांणी गोंय क्रांती दिसाच्या इतिहासीक प्रसंगार गोंयचे जनतेक परबीं भेटयल्यां. लोकांक दिल्ल्या आपल्या संदेशांत १८ जून १९४६ ह्या इतिहासीक दिसाचो उगडास करून मुख्यमंत्री म्हणटात, ह्याच दिसा ब्रिटीश सत्तेआड शौर्यान झुजलेले राष्ट्रवादी फुडारी आनी सुटके झुजारी डॉ. राममनोहर लोहिया गोंयांत आयले आनी गोंयच्या लोकांक पुर्तुगेजांचे सत्तेआड लडपाचो उलो मारलो. तांणी आपल्या भाशणांतल्यान मारिल्ल्या उल्यान गोंयकारांच्या काळजात गोंय मुक्ती खातीर झगडपाची कीट पेटली.
डॉ. ज्युलियो मिनेझिस आनी हेर म्हान फुडार्यांनी डॉ. लोहिया हांकां गोंयांत येवपाक आनी मडगांवां आताच्या लोहिया मैदाना वयल्यान गोंयच्या लोकां मुखार भाशण करपाक मजत केली. तांच्या भाशणांतल्यान स्फुर्त घेवन १९४६ वर्सा ह्याच दिसा गोंयकारांनी पुर्तुगेजांच्या परकी राजवटी कडल्यान आपल्याचेर जावपी अत्याचारां आड उक्तेपणान बंड सुरू केलां. हजारांनी गोंयकार एकठांय येवन हुकूमशाय राजवटीक विरोध केलो आनी निमाणें १९ डिसेंबर १९६१ दिसा ४५० वर्सांच्या पुर्तुगेज राजवटीतल्यान गोंय मुक्त जालें.
आयच्या ह्या प्रसंगार गोंय मुक्ती खातीर आपल्या जीणेचो त्याग केल्ल्या सगळ्या हुतात्म्यांचो आनी सुटके झुजार्यांचो उगडास करून तांकां आमी नमन करूया आनी विकसीत भारत, विकसीत गोंयां खातीर स्वता समर्पित जावया, अशें मुख्यमंत्री सांवत हांणी संदेशांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
