भांगरभूंय | प्रतिनिधी
बागपत, खबरां संस्था : दोगां भावांनीच खाश्या भावाक सोंपयल्ल्याची घडणूक मुखार आयली. आपले भाभी कडेन लग्न केल्ल्याच्या रागान दोगा भावांनीच भावाचो खून केलो. उत्तर प्रदेशच्या बागपत हांगा ही घडणूक घडली. मरण आयिल्ल्या भावाचो गुन्यांव फकत इतलोच आशिल्लो की ताणें आपल्या मरण आयिल्ल्या व्हडल्या भावाचे बायले कडेन लग्न केल्लें. हे विशीं दोगाय आरोपींक पुलिसांनी अटक केल्या.
बागपतचे अतिरिक्त पुलीस अधीक्षक एनपी सिंह हांणी सांगलें, शुक्रारा रातीं ही घडणूक घडली. एकल्याचेर फार मारिल्ल्याची म्हायती पुलिसांक मेळिल्ली. यशवीर (३२) अशें मरण आयिल्ल्या त्या भावाचें नांव. यशवीर हाचो खून ताच्या व्हडल्या भावांनी केल्ल्याची म्हायती पुलीस तपासांत कळ्ळी.
तिडकल्ल्या भावांनी भावाकूच सोंपयलो
ईश्वर हाका सुखवीर, ओमवीर, उदयवीर आनी यशवीर अशे चार पूत. ईश्वर हाचो व्हडलो पूत सुखवीर हाका फाटल्या वर्सा मरण आयलें. उपरांत ताची घरकान्न रितून ल्हान देर यशवीर हाचे कडेन लग्न केलें. भावान भाभी वांगडा लग्न केल्ल्याचें हेर दोगा भावांक आवडूंक ना. तांकां हें लग्न पटूंक ना. ताका लागून घरांत सदांच झगडें पेट्टालें. ह्याच वादांतल्यान दोगा भावांनी मेळून तिसर्या भावाचो कांटो काडलो.
हे घडणुकेच्या दुसर्या दिसा पुलिसांक हे विशीं म्हायती दिली. पुलिसांनी घडणुके सुवातेर वचून यशवीर हाची कूड ताब्यांत घेवन पोस्टमार्टमा खातीर धाडली. तांच्या बापायन केल्ले कागाळी वयल्यान पुलिसांनी दोनूय आरोप्यां आड गुन्यांव दाखल करून तांकां अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
