भांगरभूंय | प्रतिनिधी
मडगांव, प्रतिनिधी : मडगांवां सयत सासश्टी वाठारांत दोन दीस पावस उणो आसा. मात झाडां पडप आजूनय चालूच आसा. आकें मडगांवां दोन गाडयांचेर आंब्याचो व्हडलो रुख कोसळपाची घडणूक सोमारा सकाळीं घडली. हातूंत दोनय गाडयांचें सुमार ५ लाखांचें जालें, अशें मडगांव उजो पालोवपी दळान सांगलें.
दळाक मान्सून सुरु जाल्ल्याक झाडा पडपाच्यो वा झाडांच्यो खांदयो पडपाचे जायते कॉल्स आयले. फाटले दोन दीस पावसाचें प्रमाण उणें जालां, मात झाडा पडपाच्यो घडणुको उण्यो जावंक ना. दळा कडल्यान मेळिल्ले म्हायती प्रमाण, सोमारा सकाळीं सुमार ७ वरांचेर आकें मडगांवच्या मारुती लागसारचें हें झाड कोसळ्ळें. हातूंत आय २० आनी स्विफ्ट डिझायर अशा दोन गाडयांचें लुकसाण जालें. गाडयांच्या टपा सयत हारशेय फुटल्यात. दळाच्या जवानांनी वरभराचे मेहनती उपरांत हें झाड कुशीक केलें.
रुमडामळाच्या पुजा मोटर्स लागसार घराच्या पांख्यार एक मांजर आडकून उरिल्लें. दळाच्या जवानांनी ताका सकयल देंवयले. तशेंच रुमडामळ अंजूमन शाळे लागसारा रस्त्यार माखिल्ल्या चिकलाचेर उदक मारून तो येरादारी खातीर सुरक्षीत केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
