भांगरभूंय | प्रतिनिधी
मनीस हो समाजांतलो सुशिक्षीत प्राणी. देखून समाजीक उदरगती पासत संता मदीं बरे गूण आसूंक फावो प्रमाणीकपण, सेवा, विरक्तताय, भोगसणी, संयम, उपकार समता, दया, उदारपण खालतीकाय, काळजीदारपण, विश्वास, निश्ठा, नीत , सत आनी मोग. असल्या गुणांक लागून व्यक्ती आनी समाजाचें चरित्र घडटा.
हालींच मायली पब्लीकेशनाचे वतीन कवी एडवीन फेर्नांडीस हाणें बरयिल्ले ‘पाद्र विताल मिरांद: जिवीत आनी वावर’ ह्या चरित्र पुस्तकाची उजवाडावणी जाली. पाद्रीचो फोटू आनी कांय धर्मीक वस्तूं फुडल्या कव्हराचेर दाखयल्यान पाद्री मारयन जे. बार्रेटो हाणें चित्रायिल्लें मुखेल चित्र पळोवपांत सोबीत बरें दिसता. पुस्तकांत बरोवप्याची वळख दिवपी गार्डियन एंजल विद्यालयाचे मुख्याध्यापक फादर जॅरी वाझ, जाल्यार पुस्तकाक प्रस्तावना फिलीप नेरी कार्डिनाल फेर्राव हांचो संदेस फावो जाल्ल्यान पुस्तक उंचेल्या पांवड्यार उरता. पुस्तकांतल्या साराचेर एक नदर मारल्यार पाद्र विताल मिरांदाच्या जल्मांतल्यान पुस्तकांत सुरवात जाता.
आंतोनियो मिरांद आनी सांताना मिरांद हांच्या काजारी जिविताच्या एकवटाक तिस-या भुरग्याच्या रुपान 03/11/1964 वर्सा विताल जल्मांत आयले. पूण त्या आदीं पीटर आनी साल्वी हे दोग ताचे व्हडले भाव आनी मागीर विताल, ते उपरांत भाव पायटी आनी भयण सुकोरीना जल्मलीं. वितालाच्या आवय-बापायक सगळींच मेळून पांच भुरगीं. तांचें घर देवाचे कृपेन भुरग्यांच्या देण्यांनी भरलें. केपेंच्या इगर्जेंत वितालाचो बाप्तीजम जालो. आनी सॅबास्तियानो दि कॉस्तान आपल्या खोशयेन ह्या भुरग्याक वाट दाखयली. विताल फ्रांसिस्को शाव्हियर मिरांद, हें ताचें जल्माचें नांव. वितालाचो बापूय भायल्या शारांत म्हणचें कुवेट देसांत चाकरी करतालो. वितालाची मांय घरा आपल्या भुरग्यांचो बरे भशेन सांबाळ करताली. पांच भुरग्यांचो सांबाळ करप हें तितलें सोंपें काम न्हय. तरीय तांचे मांयन तांकां बरे संस्कार दिले. बरे तरेन तांचो परार्मस करुंक ती वावुरली. तेन्ना तीं शेतकामत करताली. विताल लेगीत शेतांत वतालो. भावडांच्या सांगतांक हेर कामांतूय हात-बोट घालतालो. सामको उमेदीचो मनीस आसलो.वितालाची मांय देव भिरांतीन आपलें जिवीत सारताली. घरांत सदांच तेर्स मागणें करप जातालें. ह्या वरवीं पांचूय भुरग्यांची जीण देव- भक्तीची जावंक पावली. आनी तातूंत वितालाची काळजांत देवाचो मोग वाडत गेलो.
शिक्षणाचेर एक नदर
बोरीमळ-केपें गांवांत वितालाच्या शिक्षणाक सुरवात जाली. विताल ल्हान आसतनाच आपल्या पावलांनी चलूंक हुशार आसलो. पुस्तकां खांदार घेवन पांय वटेन चलून शाळेची वाट चलतालो. ते उपरांत 1975 वर्सा पांचवेत पडटकच वितालाच्या घरा कडेन चलून गेल्यार सुमार धा मिनटांनी केपें शारांत पावतात. थंयच आशिल्ल्या हॉली क्रोस संस्थेंत प्रवेस घेतलो. 1980 वर्सा गार्डियन एंजेलांत ताणें बारावी पास केली. ते उपरांत 1984 मडगांवच्या चौगुले म्हाविद्यालयांत आनी उपरांत पाद्री जावपाची चिंतना घेवन राशोल सेमिनारींत पाद्र वितालान 1987 वर्सा पावल घालें. पाद्रीपणाचें शिकप पुराय करतना, ताणें बाराडी खुरीस, पंचवाडी आनी उर्तोडें ह्या गांवांनी कशे तरेन अणभव घेतले हाचेर बेस – बरो उजवाड लेखकान घाला.
पाद्रीची माखणी
7 माय 1994 वर्सा बिशप राऊल निक्लाव गोन्साल्वीसाच्या हाजीरपणांत पाद्र विताल केपेंच्या इगर्जेंत पाद्रीपणाची माखणी फावो जाली. त्या वेळार आवय आनी भावांनी सोयरीं – धायरीं आनी ज्या-ज्या जाग्यार पाद्र विताल इगर्जींनी आशिल्लो, थंयसरलो लोक ह्या दिसाक मिसाचे भेटेक हाजीर आशिल्लो. मिसाची तयारी करतना, ताच्या भाव-भयणींक जायतीं खुशालकाय भोगली. गांवचोय लोक खुशाल आसलो. कित्याक? केपेंच्या गांवात आनीक एक पाद्री जाल्लो देखून, केपेंचें नांव ब-या कामां खातीर वयर सरतालें.
पाद्र वितालाची नेमणुको
पाद्र विताल कूर म्हूण सांत जॉन द बापप्तिस्त चर्च बाणावलेंत पयली नेमणूक 1994 वर्सा जाली. ते उपरांत ताणें एका वर्सांचें पाद्रिपणाचें फुडलें शिकप करूंक ऑल्ड गोवा पास्तोराल संस्थेंत 1995-96 वर्स सारलें. मागीर लेडी ऑफ होप इगर्जेंत कांदोळी 1996 ते 1998, माये दोस पोब्रेस इगर्ज नुवें, 1998 -2003 , लिव्हिरा फेब्रेस इगर्जस कांसुवा- 2003 -2004 सांत एथनी चर्च देसुवा चिंचणी 2004-2009 , अवर लेडी ऑफ लूडस इगर्जीत तशेंच अश्यो साबार गोंयांतल्या इगर्जींना ताणें बरे भशेन देवाच्या मळ्यांतलो वावर करून लोकांची काळजां जिखून घेतलीं.
पाद्र मिरांदाच्या भोंवडे विशीं पुस्तकांत भोव उणीं म्हायती मेळटा. रोम, जेरुझालेम, जोर्डन, बेथाहलेंम, इजीप्त ह्या पवित्र शारांचेर तशेंच भारतांतल्या फामाद शारांनी पाद्रीन भेट दिल्या.
सोंपयतना
पाद्रीच्या यादनीकपणाचीं 30 वर्सां निमतान बरयिल्लें हें पुस्तक पाद्री वितालाचे विशीं खूब म्हायती दिता. धर्मीक गुरुचेर लेखक एडवीन फेर्नांडीसान बरोच अभ्यास केल्लो दिसून येता. हो ताचो वावर सफळ जाला अशें म्हणूं येता. देखून खेरीतपणान लेखकाक परबीं फावता. मनीस हो समाजांतलो सुशिक्षीत प्राणी. देखून समाजीक उदरगती पासत संता मदीं बरे गूण आसूंक फावो प्रमाणीकपण, सेवा, विरक्तताय, भोगसणी, संयम, उपकार समता, दया, उदारपण खालतीकाय, काळजीदारपण, विश्वास, निश्ठा, नीत , सत आनी मोग. असल्या गुणांक लागून व्यक्ती आनी समाजाचें चरित्र घडटा. ह्या पुस्तकांत ‘पाद्र विताल मिरांद: जिवीत आनी वावर’ आनी ताचे बरे गूण वाचूंक मेळटात. म्हाका दिसता, ‘देसाची राखण करपी सैनीक आनी संत समाजीक समते पासत वावर करपी, हे उत्तम चरित्रांचे आदर्श आनी देखी जावन आसात. ह्या म्हान (संत आनी सैनिकांक) मनश्यांक आमी न्हिदूंक दिवंक उपकारना…
विशाल सिनाय खांडेपारकार
8080622370
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
