भांगरभूंय | प्रतिनिधी
संकल्प आमोणकारः वास्को घालतले घाणयाऱ्या उदकाची पायपलायन
भांगरभूंय । प्रतिनिधी
वास्कोः काटे बायणाच्या घाणयाऱ्या उदक प्रक्रिया प्रकल्पांतले प्रक्रिया केल्लें उदक दर्यांत सोडिनासतना तें आतां पायपलायनी वरवीं मुरगांव बंदर प्राधिकरणाक (एमपीटी) विवीध गजालीं खातीर वापर करपाक दितले. घाणयारें उदक प्रक्रिया प्रकल्प ते मुरगांव बंदर प्राधिकरण हांचे मदीं सुमार 1.8 किलोमिटर पायपलायन घालतले. ते खातीर 2.6 कोटी रुपया खर्च करतले. ह्या कामाक 90 दीस लागतले. ह्या काळांत कामा पुराय जावचें हे खातीर आपूण लक्ष दितलों, अशें मुरगांवचे आमदार संकल्प आमोणकार हांणी सांगलें.
बुधवारा पायपलायन घालपाच्या कामाक सुरवात करून दिले उपरांत आमोणकार उलयताले. ह्या वेळार भौशीक बांदकाम खात्याचे अभियंते, कामगार, प्रभाग 9 चे कांय लोक हाजीर आशिल्ले.
हो प्रकल्प लोकाभिमूख प्रकल्प आसा. तशेंच ह्या प्रकल्पाक लागून काटे बायणा वाठारांतल्या नुस्तेमार भावांची आनी हेरांची गैरसोय पयस जातली. हें काम फाटल्या कांय वर्सां सावन आडकून उरिल्लें, पूण आतां मुख्यमंत्री डॉ. प्रमोद सावंत हांच्या आदाराक लागून चालीक लागलां, अशें आमोणकार हांणी सांगलें.
घाणयारें उदक प्रक्रिया प्रकल्पांतलें प्रक्रिया केल्लें उदक दर्यांत सोडटाले. ते संबंदांत थळाव्या नुस्तेमार भावांच्यो कागाळी आशिल्ल्यो. ह्या प्रकरणांत तेन्नाचे भौशीक बांदकाम मंत्री निलेश काब्राल हांचे मुखार आमोणकार हांणी कागाळ मांडिल्ली. ते उपरांत काब्राल हांणी पळोवणी करून दर्यांत उदक सोडचें न्हय, असो उलो मारिल्लो. आतां तें उदक दर्यांत सोडिनासतना मुरगांव बंदर प्राधिकरणाक विवीध गजालींक वापरपा खातीर दितले. त्या उदकाचो वापर बाग, बांदकाम तशेंच हेर गजालीं खातीर करपाक मेळटा, अशें आमोणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
