भांगरभूंय | प्रतिनिधी
बिलांची थकबाकी वसूल करपाची विरोधकांची मागणी
भांगरभूंय । प्रतिनिधी
पणजी : पावसाळी अधिवेशनांत हेर प्रस्नां सयत विरोधी आमदार वीज दरवाडीचेर सरकाराक धारेर धरतले. वीज दरवाडी परस थकीत बिलांचे वसुलीक सरकारान प्राधान्य दिवपाक जाय, अशी मागणी काँग्रेस विधीमंडळ गटाचे फुडारी युरी आलेमांव हांणी केल्या.
संयुक्त वीज नियामक आयोगान वीज दरवाडीक मान्यताय दिल्ल्यान गोंयांत वीज दरवाड लागू जाल्या. भौशीक सुनावणी वेळार काँग्रेस, गोवा फॉरवर्ड सयत हेर विरोधी पक्षांनी प्रस्तावीत वीज दरवाडीक विरोध केल्लो. वीज दरवाड आमकां मान्य ना. हो विशय आमी सभाघरांत मांडटले, अशें युरी आलेमांव हांणी सांगलें. सरकार सामान्य मनशां विशीं असंवेदनशील आसा, हें वीज दरवाडीन सिद्द जाल्ल्याचें विजय सरदेसाय हांणी म्हणलां. लोकसभा वेंचणुकेची आचारसंहिता सोंपले उपरांत वीज दरवाडीची कार्यवाही सुरू जाल्या. वीज दरवाडीचेर भौशीक सुनावणी जाल्ली तेन्ना काँग्रेस विधीमंडळ फुडारी ह्या नात्यान आपणे विरोध केल्लो. गोंयच्या खंयच्याच वाठारांत वीज पुरवण सारकी जायना. विजेचो आपालिपा चालूच आसता. पावस पडून झाडां पडलीं काय आपालिपा वाडटा. पावस नासलो तरी वीजपुरवण खंडीत जावपाचें प्रमाण उणें जायना. सामान्य गिरायकान विजचें बील फारीक केलें ना, जाल्यार ताका जोडणी तोडपाची नोटीस थारावीक तेंपान येता. गोंयांत 1 हजार कोटीं परस चड विजेची थकबाकी आसा. ही थकबाकी वसूल करपाचे यत्न जावपाक जाय. उद्देजक, म्हामंडळां तशेंच गिरेस्तां कडल्यान कोट्यांनी रुपया विजेची थकबाकी आसतना सामान्य मनशाचेर सरकारान हो भार घातला. भाजप डबल इंजीन सरकाराच्या काळांत बेरोजगारी आनी म्हारगाय वाडत आसा. वीज दरवाडीक लागून म्हारगाय आनीक वाडटली. काँग्रेस पक्ष हे सोंसचो ना. विधानसभेंत विरोधी आमदार आवाज काडटले, अशें युरी आलेमांव हांणी सांगलें.
सरकाराची असंवेदनशीलताय तेंगशेर : विजय
गोंया सयत पुराय देशांत बेरोजगारी आनी म्हारगाय वाडत आसा. म्हारगाय वाडत आसतनाच गोंयांत आतां वीज दरवाड जाता. हाका लागून सामान्यांची जीण आनीक कश्टाची जातली. आमदार ह्या नात्यान विधानसभेंत आपूण दरवाडीक विरोध करतलों. संयुक्त वीज नियामक आयोगा मुखार सुनावणी जाली तेन्ना लेगीत गोवा फॉरवर्ड पक्षान दरवाडीक विरोध केल्लो. जुलयांत पावसाळी अधिवेशनांत हेर विशयां सयत वीज दरवाडीचो विशय उपस्थीत जातलो. गोंयांत वीज दरवाड जाता त्या प्रमाणांत वीज पुरवणेंत सुदारणा जायना. विजेचो आपालिपा पावस नासलो तरी चालूच आसता. वीज बिलांची थकबाकी वाडटा. ती वसूल जायना आनी दुसरी कडेन वीज दरवाड जाता, अशें मत विजय सरदेसाय हांणी उक्तायलां.
आयोगाच्या आदेशाची कार्यवाही जावची : गोवा कॅन
वीज दरवाडीक गोवा कॅनान विरोध केल्लो. आयोगान मान्यताय दिल्ल्यान वीज दरवाड लागू जाता. फक्त वीज दरवाड न्हय, जाल्यार हेर गजालींची लेगीत कार्यवाही जावपाक जाय. वीज पुरवणेंत सुदारणा, दर्जेदार वीज पुरवण, बिलांचे थकबाकीची वसुली, बेकायदा वीज जोडणींचेर कारवाय करपाचे आयोगान आदेशांत म्हणलां. वीज दरवाडी सयत हेर आदेशांची लेगीत कार्यवाही जावपाक जाय, अशी मागणी गोवा कॅनचे संघटक रोलँड मार्टिन्स हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
