केरी तपासणी नाक्यार गोरवाचें मांस धरलें

भांगरभूंय | प्रतिनिधी

बेळगांवच्यान गोंयांत हाडपाचो यत्न; एकल्याक अटक, गाडी जप्त

भांगरभूंय । प्रतिनिधी

वाळपयः शेनवारा 15 जूनाक बेळगांव वाठारांतल्यान गोंया कडेन बेकायदो गोरवाचें मांस घेवन येवपी गाडयेचेर धाड घालून वाळपय पुलिसांनी सुमार 6 लाख मोलाचें सुमार तीन हजार किलो मांस जप्त केलें, तशेंच गाडी ताब्यांत घेतली. ह्या प्रकरणांत बेळगांवच्या एकल्याक अटक केल्या. हो प्रकार केरी तपासणी नाक्यार जालो.

मेळिल्ले म्हायती प्रमाण गोंया कडेन येवपी केए 26 बी 4377 नंबराची पिकअप गोंया वटेन येताली. केरी तपासणी नाक्यार त्या वाहनाची तपासणी केली तेन्ना तातूंत बेकायदो गोरवाचें मांस सांपडलें. तपासणी नाक्या वयले पुलीस सहाय्यक उपनिरिक्षक दत्तात्रय गांवस हांणी चवकशी केली तेन्ना हे संबंदांतली कागदपत्रां सादर करपाक गाडयेचो चालक मेहबूब सुभानी (29. रा. मदिना गल्ली न्यू गांधीनगर बेळगांव कर्नाटक) हाका अपेस आयलें. ताका लागून ताका मांस आनी गाडये सयत ताब्यांत घेतलो. वाळपय पुलीस स्टेशनाचेर हे संबंदांतलो गुन्यांव नोंद करून दुबावीत मेबबूब सुभानी हाका अटक केल्या, अशी म्हायती वाळपय पुलिसां कडल्यान मेळ्ळ्या.

जप्त केल्ल्या गोरवाच्या मासाचे बाजारांतलें मोल सुमार 6 लाख रुपया आसा. हे संबंदांतलो गुन्यांव वाळपय पुलीस स्टेशनाचे निरिक्षक राहूल नायक हांच्या मार्गदर्शना खाला पुलीस उपनिरिक्षक सनिशा नायक हांणी नोंद केला.

अदीक म्हायती दितना पुलीस अधिकाऱ्यांनी सांगलें, सोमारा गोंयांत ईद मनयतले. ते निमतान कर्नाटक वाठारांतल्यान व्हड प्रमाणार बेकायदो गोरवाचें मांस गोंयांत येवपाची शक्यताय आशिल्ली. ताका लागून सगळ्याच गाडयांचेर बारीक नदर दवरिल्ली. एक गाडी गोरवाचें मांस घेवन बेळगांवच्यान गोंयांत येता, अशी म्हायती मेळिल्ली. ते प्रमाण ती गाडी येताच ती आडावन तिची तपासणी केली आनी तातूंत गोरवाचें मांस मेळटाच ती जप्त केली.

चालक मेहबूब सुभानी हाची खोलायेन चवकशी करतात. ह्या प्रकरणांत आनीक दुबावीत घुस्पल्ल्याचो दुबाव आसा. तांकांय ताब्यांत घेतले, अशें पुलीस अधिकाऱ्यांनी सांगलें. मजगतीं, जप्त केल्ल्या गोरवाच्या मांसाचो पशू वैजकी अधिकाऱ्यां वांगडा पंचनामो करून ताचो विलो लायला. जाल्यार येरादारी खातीर वापरिल्ली पिकअप वाळपय पुलिसांनी ताब्यांत घेतल्या. हे संबंदांतलो फुडलो तपास चालू आशिल्ल्याचें अधिकाऱ्यांनी सांगलें.