भांगरभूंय | प्रतिनिधी
३३ लाखांचो माल केलो जप्त
पणजी : बांबोळेच्या बिग डॅडीच्या स्ट्रायक कॅसिनोंत सुरु आशिल्ल्या बेकायदो पत्त्याच्या जुगाराचेर छापो घालून गुन्यांव फांट्यान ११ जाणांचेर कारवाय केली. तांचे कडल्यान २८ लाख रुपयांचे चिप्स आनी पत्ते तशेंच हेर जुगाराचें सामान मेळून ३३ लाखांचो माल जप्त केला.
गुन्यांव फांट्या दिल्ले म्हायती प्रमाण, बांबोळेच्या बिग डॅडीच्या स्ट्रायक कॅसिनोंत बेकायदो पत्त्याचो जुगार सुरु आशिल्ल्याची म्हायती मेळ्ळी. ते प्रमाण, पुलीस अधीक्षक राहुल गुप्ता आनी सुरज हळर्णकार हांच्या मार्गदर्शनाखाला निरीक्षक किशोर रामानन हांच्या नेतृत्वा खाला पंगडान शेनवार तारीख १५ जुनाक रातच्या ११.५० वरां ते १६ जुनाक रातच्या १.४५ वरांचेर हांगा छापो घातलो. छाप्या मजगतीं हे सुवातेर दोन टेबलाचेर पत्त्यांचो जुगार सुरु आशिल्ल्याचें कळ्ळें.
उपरांत पंगडान एक वेवस्थापक, दोन कर्मचारी सयत ८ जुगार खेळपी मेळून ११ जाणांक अटक केली. ते उपरांत पंगडान दोन मेज, १४ टॅबलेट, प्लेइंग कार्ड, २ लायव्ह कार्ड शफलर, ०२ कार्ड स्कॅनर, २८ लाख रुपया मोलाचीं चिप्स आनी ३३ लाख रुपया मोलाचें हेर जुगाराचें सामान जप्त केलां. ते उपरांत निरिक्षक किशोर रामनन हांणी गोंय भौशीक जुगार कायद्याच्या कलम ३ आनी ४ खाला ११ जाणांचेर केस नोंद करून तांकां अटक केली. मजगतीं, दुबावितांची दरेकी २५ हजार रुपयांच्या वयक्तीक हमीचेर सुटका केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
