भांगरभूंय | प्रतिनिधी
आगशी पुलीस फुडलो तपास करतात
आगशी : डोंगरी- मंडूर एका बाळकाचे दोन पांय सांपडिल्ल्यान बरोच खवदळ जाला. कुडीचो हेर भाग गायब आशिल्ल्यान थळावे विंगड विंगड अदमास लायतात.
हे विशीं चड म्हायती प्रमाण; काल सांजेवेळार ७ वरांचेर मानस वाठारांत एके बायलेक पयलीं एका बाळकाचे पांय दिसले. तिणें रोखडीच थळावे पंच फ्रान्सिस्को पो हांकां ही म्हायती दिली. फ्रान्सिस्को हांणी आगशी पुलिशेक कळयलें. बाळकाचे पांय हे सुवातेर कशे पावले हाचो सोद सध्या पुलीस घेतात.
मजगतीं, हे विशीं आगशी पुलीस स्टेशनाचे उपनिरीक्षक स्वप्नील नायक हांणी कागाळ दाखल केली. हातूंत बाळकाचे दोनूय पांय डोंगरी-मंडूर हांगच्या मानशेच्या दारांनी आडकून आशिल्ल्याची म्हायती मुखार आयिल्ली. कागाळेची दखल घेवन बायल उपनिक्षक नेहंदा तावरीस हांणी अनवळख्या आड गुन्यांव दाखल करून तपास सुरू केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.