भांगरभूंय | प्रतिनिधी
कंपनीच्या दोन अर्थीक सल्लागारां सयत स जाणांचेर गुन्यांव नोंद
पणजी, बातमीदार ः गोंयांतल्या नामनेच्या चौगुले गटाच्या चौगुले अँड कंपनी प्रा. लिमिटेडाची 1075 कोटींची फटवणूक केल्ल्या प्रकरणांत गोंय पुलिसांच्या अर्थीक गुन्यांव खात्यान कंपनीच्या दोन अर्थीक सल्लागारां सयत स जाणांचेर गुन्यांव नोंद केला.
चौगुलेच्या परदेशांतल्या रुद्रा कंपनीन इंग्लंडांतल्या प्रताप शिर्केच्या कंपनीक सुमार एक हजार कोटी रुपयाचें रीण दिल्लें. चौगुलेचे अर्थीक सल्लागार विजय चौगुले आनी रोदीप महात्मे हांणी मंडळाक तशें निर्देश दिल्या उपरांत प्रताप शिर्के हांचे कंपनींक हें रीण दिल्लें. शिर्के हांच्या शिपिंग कंपनींत गुंतवणूक करपाच्या नांवान दिल्लें रीण संचालक मंडळान मान्य करूंक नाशिल्लें. ते उपरांत चौगुले, महात्मे आनी शिर्के हांच्या सांगण्या वयल्यान शिर्के हांचे कंपनींचे रीण माफ केलें. ताका लागून चौगुले कंपनींक रु. एक हजार कोटी लुकसाण जालां अशें हर्ष शाह हांणी अर्थीक गुन्यांव खात्यांत दाखल केल्ले कागाळींत म्हणलां.
मजगतीं, शाह हांचे कागाळीची चवकशी करून खात्यान विजय चौगुले, रोदीप महात्मे, प्रताप शिर्के हांचे सयत फोर्ट ग्रुप, मारिया पुंचेर आनी ज्ञात आनी अज्ञात असोसिएट्स हांचे आड गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
