भांगरभूंय | प्रतिनिधी
मडगांव, प्रतिनिधी ः परदेशांत कायम नोकरी दिवपाचे हांयस दाखोवन फ्रान्सिस बार्रेटो, अविटा बार्रेटो आनी पीटर फर्नांडीस हांणी 4.74 लाख रुपया घेतले. पूण नोकरी दिली ना आनी पयशेय परत दिले नात. हे विशीं दिपाली सिराट हांणी कागाळ दाखल केली. ह्या प्रकरणांतल्या तिनूय दुबावितां आड फातोर्डा पुलिसांनी गुन्यांव नोंद केला.
मेळिल्ले म्हायती प्रमाण दुबावीत फ्रान्सिस बेंजामिन बार्रेटो, अविटा बार्रेटो (दोगूय रावपी शिरोड्यां, फोंडें) आनी पीटर जॉन फर्नांडीस (फातोर्डा, मडगांव) हांणी मडगांवांतल्या मुरिडा हांगा रावपी दिपाली कपिल सिराट हांच्या मडगांवांतल्या फिटनेस स्पेस हांगा मेळून केमन आयलंड्स हांगा नोकरी दिवपाचे हांयस दाखयले. दिपाली हांचे कडल्यान यूपीआय वरवीं 3.74 लाख रुपया घेतले जाल्यार 1 लाख रुपया रोख रक्कम घेतली.
ह्या नोकरे खातीर पयशांचो वेव्हार 24 डिसेंबर 2022 दिसा जाल्लो. पूण मागीर फ्रांसिसान तात्पुरत्या कामांचे बनावट फॉर्म हाडले. तिनूय दुबावितांक दिपालीक परदेशांत नोकरी दिवंक शक्य जाले ना. हे घडणुकेचे दोन वर्सां उपरांत दिपालीन पयशे परत करपाक सांगले तेन्ना तिगांयनीय पयशे परत करूंक ना. देखून दिपाली सिराट हांणी फातोर्डा पुलिशेंत कागाळ दाखल केली. फातोर्डा पुलिसांनी अर्थीक फटवणूक केल्ल्या प्रकरणांत तिनूय दुबावितां आड गुन्यांव नोंद केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
