भांगरभूंय | प्रतिनिधी
मडगांव, प्रतिनिधी ः बनावट पॉवर ऑफ ॲटर्नी तयार करून तें खरें म्हूण सबरजिस्ट्रार कडेन सादर केलें. उपरांत मडगांव पालिकेच्या कागदपत्रांतल्यान कांता बोरकार हांचें नांव वगळून कुटुंबाची फटवणूक करपाचो प्रकार घडला. ते विशीं अंजली बोरकार हांणी कागाळ दाखल केल्ली. ते प्रमाण मडगांव पुलिसांनी तीन दुबावितां आड गुन्यांव नोंद केला.
मेळिल्ले म्हायती प्रमाण, 2001 वर्सा बनावट पॉवर ऑफ ॲटर्नी तयार करून घराच्या कागदपत्रांतल्यान धनयाचें नांव काडून उडयल्ल्या प्रकरणांत आगळीच्या अंजली बोरकार हिणें मडगांव पुलिशेंत कागाळ केल्ली. कागाळी प्रमाण आनंद बोरकार हांणे हर्मीस लोबो आनी तेरेझा लोबो (रा. खारेबांध) हांच्या आदारान फटवणूक करपाच्या हेतान आनंद हांचो काका कांता बोरकार हांच्या नांवा वयल्या खारेबांध प्रभाग 16 तल्या एका घराच्या संबंदीत बनावट पॉवर ऑफ ॲटर्नी तयार केलें. हे बनावट पॉवर ऑफ ॲटर्नी खरे आशिल्ल्याचें दाखोवन मडगांव सबरजिस्ट्रारांत सादर केलें. ह्या कागदपत्रांच्या आदाराचेर मडगांव पालिकेच्या कागदपत्रांतल्यान घराच्या मालकींतल्यान कांता बोरकार हांचे नांव वगळ्ळें. बनावट पॉवर ऑफ ॲटर्नी तयार करुन बोरकार कुटुंबाची फटवणूक केल्ल्या प्रकरणात मडगांव पुलिसांनी दुबावीत आनंद बोरकार, हर्मिस लोबो आनी तेरेझा लोबो हांचे आड गुन्यांव नोंद केला. ह्या प्रकरणांत मडगांव पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
