भांगरभूंय | प्रतिनिधी
वाळपय, प्रतिनिधी ः बेबकांची शिकार करप्यां आड आतां खर कारवाय करतले. हे खातीर वेगवेगळ्या सुवातींनी रान कर्मचाऱ्यांक तैनात केल्यात. बेबकांची शिकार करपाचो कोणेंच यत्न करचो न्हय. गांवां-गांवांनी बेबकां मारपाक भोवपी लोकां आड कारवाय करपाक नागरिकांनी रान खात्याच्या अधिकाऱ्यांक पालव दिवचो, असो उलो वाळपय रान खात्याच्या अधिकाऱ्यानी केलां.
पावसाक सुरवात जाले उपरांत बेबकांची शिकार करपाचें प्रमाण वाडटा. हाचें आदीं अशें प्रकारची व्हड प्रमाणांत शिकार जाताली. पूण खात्याच्या अधिकाऱ्यांनी हे संबंदी खर कारवाय सुरू केल्या उपरांत ही शिकार उणी जाली. पूण, ह्या प्रकारची शिकार पुरायपणान बंद जावपाची गरज आसा. ना जाल्यार येवपी काळांत बेबकांची संख्या व्हड प्रमाणांत उणी जावपाची शक्यताय आसा. तशें जालें जाल्यार ताचो पर्यावरण आनी जैवविविधतेचेर व्हड परिणाम जावंक शकता. हाका लागून रान खात्याच्या अधिकाऱ्यांनी हें संबंदी खर मोहीम सुरू केल्या.
हे संबंदी चड म्हायती दितना अधिकाऱ्यानी सांगलें, पंदरा दिसां सावन रान खात्याच्या अधिकाऱ्यांक 24 वरां ड्युटीचेर दवरल्यात. हे खातीर वेगवेगळे युनिट तयार केल्यात. तांका वेगवेगळ्या वाठारांनी तैनात केल्यात. बेबकांची शिकार करप्यां आड खर कारवाय करतले अशी शिटकावणी रान अधिकाऱ्यानी दिल्या.
मजगतीं, सत्तरी तालुक्यांत व्हड प्रमाणांत न्हंय, व्हाळ आसात. पावसाच्या दिसांनी ह्या वाठारांनी व्हड प्रमाणांत बेबकांची शिकार जावं येता अशें रान अधिकाऱ्यांनी स्पश्ट केलां.
हीं बेबकां मागीर हाॅटेलांक विकतात. ताचें मांस रुचीन खावपी शेंकड्यांनी गोंयकार आसात. हालींच्या कांय वर्सांनी हो प्रकार लिपचोरयां जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
