भांगरभूंय | प्रतिनिधी
वाळपय, प्रतिनिधी ः वेळगें- सत्तरींत गोरवां चोरून व्हरपाचो यत्न करपी तिगांक शुक्रारा रातीं 10 वरांचेर थळाव्या लोकांनी फाटलाव करून धरले. पूण तांतूतल्या एका मनशान पळ काडलो. उरिल्ल्या दोगांक थळाव्या लोकांनी वाळपय पुलिसांच्या ताब्यांत दिले. ह्या प्रकाराक लागून उसरां मेरेन वेळगे वाठारांत तणावाचें वातावरण निर्माण आशिल्लें.
रातच्या 10 वरांचे गांवांत एक पिकअप थांबली. तुजो बैल रामनगर हांगा शेतकामा खातीर व्हरतां अशें सांगून बैलाच्या धनयाक पयशे दिले आनी बैलाक पिकअपांत घालपाचो यत्न सुरु केलो. तेन्नाच थळाव्या लोकांक दुबाव येवपाक लागलो तेन्ना तांणी चड म्हायती जाणून घेतली पूण तांकां समाधानकारक जाप मेळूंक ना. उल्लेख केल्लो बैल रामनगरा बदला कत्तल करपा खातीर नाणूस व्हरताले हें स्पश्ट जालें. थळावे लोकांनी ह्या तिगांक धरले. पूण एकल्यान पळ काडलो.
हे विशीं म्हायती वाळपय पुलिशेंत दिले उपरांत पुलिसांनी रोखडेच येवन दोगांक अटक करून पुलीस स्टेशनांत व्हेले. आनी तांचे आड गुन्यांव नोंद केलो.
गोरवां पोसप्यांनी सादूर रावचें
सत्तरी तालुक्याच्या जायत्या वाठारांनी फाटलीं कितलींशींच वर्सां गोरवां चोरपाचे प्रकार जाल्यात. ते खातीर थळाव्या लोकांनी सादूर रावपाचो उलो गोरवां मोगींनी केलां. वेळगेच्या थळाव्या लोकांनी दिल्ले म्हायती प्रमाण, सकाळ सावन उल्लेख केल्ल्या दुबावितांनी व्हड प्रमाणांत गोरवां चोरल्याचो दुबाव उक्तायला. तांकां धरले उपरांत तांच्या मोबायलाचेर अशें तरेचे रेकॉर्डिंग मेळ्ळे आनी तांणी गोरवां खंयच्यान चोरल्यात, चोरुन खंय व्हरतात हाची सविस्तर म्हायती तांच्या मोबायलाचेर आशिल्ल्याचो दावो थळाव्या लोकांनी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
