नीट परिक्षा हाचे मुखार नीट जावची

भांगरभूंय | प्रतिनिधी

ही परिक्षा विद्यार्थ्यांच्या फुडारा खातीर सामकी म्हत्वाची. तीस- चाळीस वर्सां पयलीं धावेचे परिक्षेक जितलें म्हत्व (आयजूय आसा) आशिल्लें ताचे परस चड म्हत्व आयज हे नीट परिक्षेक आसा.

नीट- युजी म्हणल्यार राष्ट्रीय पात्रताय प्रवेश परिक्षा फाटले कांय दीस वादांत घुंवत आसा. अजून सर्वोच्च न्यायालयांत ती केश आसा. बिरेस्तारा जाल्ले सुनावणेंत 1563 विद्यार्थ्यांक वाडीव गूण दिवपाचो नॅशनल टेस्टींग एजन्सीचो (एनटीए) निर्णय सर्वोच्च न्यायालयान रद्द थारायलो. एनटीए ही परिक्षा घेता. म्हणटकच आतां ते वाडीव गूण रद्द जातले. न्यायालयाच्याच 2018 तल्या निकालाचेर आदारून ते दिल्यात अशें एनटीए म्हणटा तरी अशे गूण दिवप योग्य न्हय. कारण, स जाणांक 720 मदले 720 गूण मेळ्ळ्यात. फाटले कांय दीस विद्यार्थी आनी पालकांचें आंदोलन चालू आसा. तातूंत एके बायलेन धावी, बारावेत पास क्लासांत आयिल्ल्या एका विद्यार्थ्याचो ह्या स जाणां मदीं आस्पाव आसा, असो गंभीर आरोप केला. परिक्षा दिवपाक वेळ मेळूंक ना, म्हूण अशे वाडीव गूण दिल्ल्याचो युक्तीवाद एनटीए करता. पूण, हो उशीर परिक्षा घेवपी शिक्षकांक लागून, वेळाच्या गैरवेवस्थापनाक लागून जालो, हें सामकार आयलां. तांकां प्रशिक्षणाची खर गरज आसा.
23 जूनाक आतां ह्या 1563 विद्यार्थ्यांची परतून परिक्षा जातली आनी 30 जूनाक निकाल लागतलो. कोणाक परतून परिक्षेक बसपाचें ना जाल्यार तांकां 5 मे दिसा जाल्ले परिक्षेंत मेळिल्ल्या मूळ गुणांचेर समाधान मानचें पडटलें वा 23 जूनाक परतून परिक्षा दिवची पडटली. हे विद्यार्थी आसात, त्याच स शारांनी, वेगळ्यावेगळ्या केंद्रांचेर ती परिक्षा घेतले. नीट जावं हेर म्हत्वाच्यो परिक्षा विद्यार्थ्यांच्या फुडारा खातीर सामक्यो म्हत्वाच्यो. वैजकी मळाची आवड आशिल्ल्यां खातीर तर नीट गरजेची. तीस- चाळीस वर्सां पयलीं धावेचे परिक्षेक जितलें म्हत्व (आयजूय आसा) आशिल्लें ताचे परस चड म्हत्व आयज हे नीट परिक्षेक आसा. ती पास जावंक ना जाल्यार वैजकी शिक्षण विसरप. बिहार, उत्तर प्रदेश, महाराष्ट्रांतले खास करून गरीब विद्यार्थी शारांनी येवन रावतात. परिक्षे खातीर खास ट्युशनां घेतात. रातदीस अभ्यास करतात. आयएएस, आयपीएस परिक्षां खातिरूय हेंच जाता. घरचे रीण काडून, जमीन विकून तांकां पयशे धाडटात आनी तांच्या निकाला कडेन दोळे लावन बसतात. परिक्षा पास जातलोंच ही जिद्द ह्या विद्यार्थ्यां मदीं आसता. जरी ते सगलेच हुशार नासले तरी. मागीर तातूंतले कांय जाण नापास जातकच परतून परतून ती परिक्षा दीत रावतात आनी तरीय येश मेळूंक ना जाल्यार निरशेतात, आत्महत्याय करतात. ह्या परिक्षांचें म्हत्व लक्षांत घेवन कांय वसवशे धूर्त तज्ञ निश्पाप विद्यार्थ्यांचो गैरफायदोय घेतात. तांचे कडल्यान ट्युशना खातीर खूब पयशे घेतात. तांकां स्वताचीं पुस्तकां, गायड विकत घेवपाक लायतात. ही नीट तातूंतलीच एक म्हत्वाची परिक्षा. म्हणूनच विद्यार्थ्यांचें समुपदेशन करपाचो आदेश सर्वोच्च न्यायालयान एनटीएक दिला. भिवपाची गरज ना, अशेंय विद्यार्थ्यांक सांगलां.
परिक्षा उसरां सुरू जाली. आमकां पेपर बरोवपाक फावसो वेळ मेळूंक ना हे खातीर बरेच विद्यार्थी न्यायालयांत गेले. छत्तीसगढांतलीं दोन, चंडीगढ, हरियाणा, मेघालय, गुजरात हांगाचीं एक- एक केंद्रां तातूंत आशिल्लीं. एनटीएचे खाशेले समितीन चवकशी करतकच कागाळी खऱ्यो तें कळ्ळें आनी तांचे शिफारसी वयल्यान वाडीव गूण दिले. उपरांत हेर विद्यार्थ्यांनी सरळ सर्वोच्च न्यायालयाचीं दारां धाेडायलीं. देशभर बोवाळ जातकच सरकार आनी एनटीएन नवी समिती नेमली. तिणें सांगलें वाडीव गूण रद्द करात. परतून परिक्षा घेयात. आतां त्या 1563 विद्यार्थ्यांची परतून परिक्षा जातली. निकाल 30 जूनाक. वैजकी शिक्षणा खातीर प्रवेश घेवपाक विद्यार्थ्यांक उशीर जावचो ना, ही तातूंतले तातूंत बरी गजाल, पूण तांकां आनी हेर विद्यार्थ्यांक मनस्ताप जालो, ताचें कितें?
मुळांत पेपर परिक्षे पयलीं फुट्टात, काॅपी मारपाक दितात, पेपर तपासपी चड गूण दितात अशे आरोप फाटल्या कितल्याश्याच वर्सां सावन जायत आसात. उंचेल्यो परिक्षाच न्हय, तर हायस्कूल पांवड्या वयल्या परिक्षां बाबतींतूय अशे आरोप, प्रत्यारोप जाल्यात…. आनी हे एकान एक आरोप 100 टक्के फट अशें कोण म्हणीत अशें दिसना. कारण देशांत खंय ना खंय प्रत्येक परिक्षे वेळार हे पराक्रम जाल्ल्याच्यो खबरो येतात. ह्या गोंदळाक लागून नीट परिक्षेचीय विस्वासार्हता उणी जाल्या, हें मात खरें. निदान हाचे मुखार नीट परिक्षा नीट जावची, अशेंच देशभरांतल्या विद्यार्थ्यांक दिसता आसतलें.