भांगरभूंय | प्रतिनिधी
फोंडें, प्रतिनिधी: भाजप सरकारांत म्हत्वाच्या वीज मंत्री पदार आशिल्ले सुदिन ढवळीकार हांणी भाजपा वावुरप्यांचेर केल्ले आरोप चुकीचे आसात. उरफाटी भाजप – मगोची युती आसतनाय मडकय मतदार संघांत मगो पक्षाची मतां भाजपाक उणीं पडिल्ल्याचें दिसता. मंत्री पदार आसतना वावुरप्यांचेर केल्ल्या आरोपाचो आमी निशेध करतात आनी मुख्यमंत्र्यानी ढवळीकार हांकां पदा वयल्यान काडून उडोवपाची मागणी करतां. अशें मडकय मतदार संघातल्या भाजपा वावुरप्यांनी शुक्रारा पत्रकार परिशदे घेवन सांगलें.
ह्या वेळार सुदेश भिंगी, दिनेश वळवयकार, संतोष रामनाथकार, जयराज नायक, प्रशांत नायक आनी सुभाष गावडे हे भाजपा वावुरपी हाजीर आशिल्ले.
सुदेश भिंगी हांणी सांगलें, युतीच्या सरकारांत आसतना वीज मंत्री ढवळीकार हांणी भाजप वावुरप्यांचेर आरोप केल्यात. लोकसभा वेंचणुकेंत भाजप वावुरप्यांनी काम करूंक ना ह्या तांच्या वक्तव्यान भाजप वावुरप्यांक त्रासांत घालां. कारण आमी तन, मन ओंपून लोकसभा वेंचणुकेंत नेटान काम केलां. तेन्ना अशे बेजबाबदार आरोप करपी ढवळीकार हांकां मुख्यमंत्री प्रमोद सावंत हांणी मंत्री पदा वयल्यान काडपाची गरज आसा.
मडकय मतदारसंघांत भाजपांत मात पसून फूट ना. सगळे एकवटान काम करतात. वरिश्ठ फुडार्यांच्या आदेशा प्रमाण आमी काम करतात. बेगीनूच मडकय मतदार संघांत नव्या भाजप मंडळाची निवड करतले अशें भिंगी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
