भांगरभूंय | प्रतिनिधी
नवी दिल्ली, खबरां संस्था ः हालींच जाल्ले लोकसभा वेंचणुकेंत 8,360 उमेदवारांतल्या 7,194 उमेदवारांनी वट्ट 16.36 कोटी रुपयांची सुरक्षा ठेव वगडायली. वेंचणूक आयोगान दिल्ले आंकडेवारींतल्यान हें दिसून आयलां. उमेदवारांक तांच्या मतदारसंघांतल्या वट्ट वैध मतांतली षष्ठांश मतां मेळूंक नात जाल्यार ठेवी जप्त करतात.
जप्त केल्ल्या रकमेचें कितें जाता?
लोक प्रतिनिधी कायदो, 1951 प्रमाण भारतांत सार्वत्रिक वेंचणूक लढोवपी उमेदवारांक वेंचणूक आयोगा कडेन 25,000 रुपया जमा करचे पडटात. वेंचणुके विशीं गंभीर आशिल्ल्या उमेदवारांनीच वेंचणूक लढोवपाक अर्ज करचे हे खातीर सुरक्षा जमा करप सक्तीचें आसा. 2009 वर्सा राखीव ठेवीची रक्कम अनारक्षित सुवातींच्या उमेदवारांक 25 हजार रुपया आनी आरक्षीत अनुसुचीत जाती (एससी) आनी अनुसुचीत जमाती (एसटी) सुवातीं खातीर 12,500 रुपया मेरेन वाडयिल्ली. ही रक्कम विधानसभा वेंचणुकेंत 10 हजार रुपया आनी अनुसूचित जाती/जमातींच्या सुवातीं खातीर 5 हजार रुपया मेरेन वाडयिल्ली.
वेंचणूक आयोगाच्या म्हणण्या प्रमाण, उण्यांत उणें षष्ठांश मतां मेळूंक नाशिल्ल्या उमेदवारांकडल्यान जप्त केल्ली रक्कम रिझर्व्ह बँकेंत वा सरकारी खजिन्यांत दवरतात. 2019 त वट्ट 8045 उमेदवारांतल्यान 6923 उमेदवारांक 15.87 कोटी रुपयांची ठेवी वगडावची पडिल्ली. 2019 वर्साचे तुळेंत अंदूं रक्कम जप्त जावप्यांचो आंकडो वाडला.
सगळ्यांत चड उमेदवार बसपाचे
बहुजन समाज पक्षान (बसप) अंदूंचे वेंचणुकेंत 488 उमेदवार उबे केल्ले, तातूंतले कोणूच वेंचणूक जिखूंक शकले नात. बसपाच्या 476 उमेदवारांक ठेवी रक्कम वगडावची पडली. बसपा उमेदवारांनी वट्ट 1.04 कोटी रुपया वगडायल्यात. बसपान 26 राज्यांनी आनी केंद्रीय प्रदेशांनी आपले उमेदवार उबे केल्ले. 2019 वर्सा लेगीत सगळ्यांत चड जप्त करपी पक्षां मदीं बसपा पयले सुवातेर आशिल्लो. ते वेंचणुकेंत वट्ट 383 उमेदवारांतल्यान 345 उमेदवारांक आपली ठेवी रक्कम वगडावची पडिल्ली.
सगळ्यांत चड ठेवी वगडावपी हेर पक्षांत काँग्रेसीचे 51 उमेदवार, प्रकाश आंबेडकर हांच्या फुडारपणा खाला वंचीत बहुजन अघाडीचे 37 उमेदवार, अखिल भारतीय फॉरवर्ड ब्लॉकाचे (एआयएफबी) 33 उमेदवार, सीपीआयचे (एम) 30 उमेदवार आनी भाजपाचे 28 उमेदवार आशिल्ले. हातूंत अपक्ष उमेदवारांचो वांटो सगळ्यांत चड आसा. 3,920 अपक्षांतल्या 3,904 उमेदवारांनी 8.96 कोटी रुपयांची ठेवी वगडायली.
खंयच्या राज्यात सगल्यांत चड ठेवी जप्त?
राज्यां मदीं महाराष्ट्रांत सगळ्यांत चड 1,020, तमिळनाडूंत 863 आनी उत्तर प्रदेशांत 681 ठेवी जप्त जाल्यात. हेर खंयच्याच राज्यांत 500 परस चड उमेदवारांची ठेवी जप्त जावंक ना. ह्या तिनूय राज्यांतल्या लोकसभा सुवातीं वयल्यान अनुक्रमान 1121, 950 आनी 851 उमेदवारांनी वेंटणूक लढयल्ली. 2019 वर्साय ह्या तिनूय राज्यांनी सगळ्यांत चड ठेवी जप्त जाल्ली.
मणिपूर, मेघालय, मिझोराम सयत फकत एक वा दोन लोकसभेची सुवात आशिल्ल्या कांय ल्हान राज्यांनी वेंटणूक मळार आशिल्ल्या अर्दे उमेदवारांची ठेवी जप्त जाला. जप्त करपाचें प्रमाण सगळ्यांत उणें प्रमााण नागालँडांत आशिल्लें, थंय तीन उमेदवारांतल्या फकत एका उमेदवारान आपली ठेवी वगडायली. 2019 वर्सा चंडीगढ, तेलंगणा आनी तमिळनाडूंत अनुक्रमान 94.44 टक्के, 91.2 टक्के आनी 91.06 टक्के उमेदवारांनी ठेवी वगडायली. सगळ्यांत उणो आंकडो दमण आनी दीवांत आशिल्लो, जो फकत 25 टक्के आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
