भांगरभूंय | प्रतिनिधी
पुलीस गरजेचें मार्गदर्शन करतले
मडगांव, प्रतिनिधी : सध्या पालकांक फोन करुन भुरगीं त्रासांत आशिल्ल्याचें सांगून पयशांची मागणी करपाचे प्रकार घडटात. अशे फोन आयल्यार कोणेंच पयशे दिवचे न्हय. पयलीं पुलिसांक कळोवचें. पुलीस मार्गदर्शन करतले, अशें मडगांव पुलीस उपअधीक्षक सलीम शेख हांणी सांगलें.
सलीम शेख हांणी सांगलें: राज्यांत लोक अर्थीक नदरेन फटवतात अश्यो कागायी येतात. फोन करुन वीज कनेक्शन तोडपाचें सांगून, लॉटरी लागिल्ल्याचें सांगून फटयतात. सध्या भुरग्यांचें अपहरण केल्ल्याचें, ताचो अपघात जाल्ल्याचें सांगून पयशे मागतात. पालकांक अशे तरेन फटवणूक करपी फोन आयल्यार तांणी पयशे युपीआय वा ऑनलायन पद्दतीन दिवचे न्हय. पालकांनी पुलिसांक कळोवचें. पुलीस मार्गदर्शन करतले. गोंय पुलिसांच्या सायबर पुलीस, गुन्यांव फांटो आशिल्ल्यान ताचे वरवीं तपास करतले. भावनांनी व्हांवून वा आबूज, काचाबूल जावन लोकांनी अर्थीक लुकसाण करून घेवचें न्हय. कोणेंय ओटीपी, बँक खात्याची म्हायती वा पयशे मागल्यार ते दिवचे न्हय. सोशल मिडियाचेर आपूण खंय वता आनी कितें करतले अशी म्हायती घालची न्हय. डिजिटल माचये वयल्यान अकावंट हॅक करपाच्यो कांय कागाळीय आयल्यात.
वेर्णें, नुवें, लोटले, नावेले, चिंचणी वाठारांतल्या पालकांक भुरग्यांचें अपहरण केल्ल्याचे फोन येतात. हे विशीं पुलीस उपअधीक्षक शेख हांणी, खंयच्याय पालकाक अशे फोन आयल्यार तांणी पुलिशेंत कागाळ करची अशें स्पश्ट केलें.
92…. नंबरा वयल्यान येवपी कॉल उखलूं नाकात
अनवळखी मोबायल नंबरा वयल्यान भुरग्यांच्या पालकांक फोन करून अपहरण केल्ल्याची म्हायती दितात. ह्या मोबायलाचेर पुलिसांचो फोटो येता आनी ती व्यक्ती चडशी हिंदी भाशेंत उलयता.भुरग्यांक मारबडय करतले अशी धमकी दिवन पालकांक तांच्या कुटुंबीयांची आनी कॉलेजीची म्हायती सांगतात आनी पयशे मागतात. लोकांनी 92…… नंबरा पसून सुरु जावपी फोन उखलचो न्हय. कॉला वयल्यान सांगिल्ले म्हायतीची खात्री करून घेवची आनी पुलिसांक कळोवचें, असो उलो शेख हांणी मारलो.
राज्यांत पालकांक येवपी भुरग्यांच्या अपहरणाच्या फोनां विशीं पुलिसां सयत समाज वावुरपी आनी सगळ्या घटकांनी लोकां मदीं जागृताय हाडपाची गरज आसा. अनवळखी कॉल्स कोणेंच उखलचे न्हय. पुलिसांनी लोकांक जागृत करपा खातीर यत्न करचे, अशी मागणी केल्ल्याचे कॉंग्रेस फुडारी एल्विस गोम्स हांणी सांगलें. एल्विस हांचे सयत कॉंग्रेस कार्यकर्त्यांनी पुलीस उपअधीक्षक सलीम शेख हांचीय भेट घेवन ह्या मुद्द्याचेर चर्चा केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
