भांगरभूंय | प्रतिनिधी
मडगांव, : जिल्होधिकारी कार्यालय इमारतीच्या वॉशरुमांचे नितळसाणीचें काम ३१ मे मेरेन पुराय जावपाचें आशिल्लें. मात विवीध समस्यांक लागून तें जावंक ना. पयल्या टप्प्यांतलें काम ३१ जुलय मेरेन पुराय जातलें. जाल्यार न्यायालयाची नवी इमारत पुराय जावपाक सुमार एक वर्स लागतलें, अशें कायदो मंत्री आलेक्स सिक्वेरा हांणी सांगलें.
आलेक्स सिक्वेरा हांणी दक्षीण गोंय जिल्होधिकारी कार्यालयांतलो रुम नंबर ४०४ त लोकांक भेट दिवपाचो उपक्रम लोकसभा वेंचणुके उपरांत परत सुरू केला. मंत्रीपद स्विकारल्या उपरांत तांणी दर शुक्रारा लोकांच्यो भेटी घेवन तांच्यो समस्या सोडोवपाचें आस्वासन दिल्लें. ते प्रमाण ते दर सप्तकांत समस्या जाणून घेतात. दक्षीण गोंय जिल्होधिकारी कार्यालयांतल्या वॉश रुमांची अवस्था सामकी वायट जाल्ली. ताचो त्रास सरकारी कर्मचार्यां सयत थंय कामाक येवपी लोकांकूय जातालो. सिक्वेरा हांणी ताची दखल घेवन थंयच्या वॉश रुमांच्या कामाचेर लक्ष दिल्लें. ३१ मे मेरेन पयल्या टप्प्यांतलें करतले अशें सांगिल्लें.
हाचेर उलयतना मंत्री सिक्वेरा हांणी सांगलें, विवीध आडखळीं लागून मे म्हयन्या मेरेन हें काम पुराय जावंक ना. एका मुखेल ब्लॉकाचें काम ३१ जून मेरेन, जाल्यार दुसर्या ब्लॉकांतलें काम ३१ जुलय मेरेन पुराय जातलें अशें ठेकेदारांनी सांगलां.
ठेकेदारांनी दिल्ले म्हायती प्रमाण, सरकारी कर्मचारी जेवले उपरांत सिंकांत डबे धुतात. ताका लागून उश्टें पायपांत आडकून तीं बंद जातात आनी घाणयारें उदक व्हांवून वचना. ताका लागून वेगळी वेवस्था करपाक जिल्होधिकार्यांक सांगलां. तशेंच ज्या एजन्सींकडेन वॉशरुमांचे दुरुस्तीचें काम दिता ती एजन्सी योग्य तरेन काम करिना. तांकांय सुचवण्यो दिवपाक सांगलां.
मजगतीं, न्यायालयाचे नवे इमारतीचें काम सध्या सुरु आसा. हे इमारतीचें काम पुराय जावपाक आनीक स ते सात म्हयन्यांच काळ वतलो, अशें अभियंत्यांन सांगलें. इमारत रोखडीच उबारतलें, मात हेर फिनिशींग कामां आसतलीं. ताका लागून सुमार एका वर्साच्या काळांत न्यायालयाची इमारत बांदून पुराय जातली. पार्किंगाचो प्रस्न कायम आसा. तशेंच सकयल्या वाठारांनी रांस मारल्यार जावपी परिणामांच्या अभ्यासा उपरांत निर्णय घेतले अशेंय मंत्री सिक्वेरा हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
