भांगरभूंय | प्रतिनिधी
नवी दिल्लीः अमेरिकेंत फाटल्या वर्सा विक्रमी १ लाख ४० हजार विद्यार्थी व्हिसा जारी केल्यात आनी अंदूं भारतीय विद्यार्थ्यांच्या अर्जांत वाड जावपाची शक्यताय आसा, अशें भारतांतल्या अमेरिकेच्या वाणिज्य दूतावासांतल्या वरिश्ठ अधिकार्यान सांगलें. भारतांतल्या युएस मिशनान आयतारा देशभरांत आठवो वर्सुकी विद्यार्थी व्हिसा दीस मनयलो.
हाचे खाला नवी दिल्ली, चेन्नय, हैदराबाद, कोलकाता आनी मुंबयच्या कॉन्सुलर अधिकार्यांनी विद्यार्थी व्हिसा अर्जदारांची मुलाखत घेतली. दिल्लींतल्या अमेरिकन दुतावासांत सकाळीं सावन विद्यार्थ्यांची लांब रांक दिसली. व्हड प्रमाणांत भारतीय विद्यार्थी अमेरिकन विद्यापिठांत शिकतात. फाटल्या वर्सा भारतांतल्या अमेरिकेच्या वाणिज्य दुतावासांतल्यान १ लाख ४० हजारां परस चड विद्यार्थी व्हिसा जारी केल्यात. हो आंकडो हेर खंयच्याय देशा परस चड आसा.
अमेरिकेच्या दूतावासांतले कार्यवाह कौन्सुल जनरल सय्यद मुजतबा अंद्राबी हांणी सांगलें, दिसांतल्यान सुमार चार हजार विद्यार्थ्यांची मुलाखत घेवपाचो अदमास आसा. विद्यार्थी व्हिसा हें आमचें एक मुखेल प्राधान्य. दोनूय देशां मदीं शिक्षणीक आदान-प्रदान हें ह्या प्रशासनाचें आनी आमच्या मिशनाचें एक मुखेल प्राधान्य. अमेरिकेचो राजदूत एरिक गार्सेट्टी हांणी एप्रिलांत पीटीआय कडेन उलयतना सांगलें, विद्यार्थ्यांची आवड आयुश्यभर तिगून उरता हें अमेरिकेक खबर आशिल्ल्यान विद्यार्थ्यांच्या व्हिसाक ‘सगल्यांत चड प्राधान्य’ दिता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
