भांगरभूंय | प्रतिनिधी
रस्त्यां वेल्या विवीध कामांक लागून अपघातांनी वाड
फोंडें: फोंडें वाठारांत फाटल्या 20 दिसांत विवीध अपघातांनी वट्ट 6 जाणांक मरण आयलें. तशेंच हेर अपघातांनी खूबशे जाण जखमी जावपाचे प्रकार घडले. वाडट्या वाहनांची संख्या आनी नेमांचो भंग करपी चालकाक लागून अपघात घडत आसले तरी अशीर रस्त्याक लागून आनी विवीध कामां पावसाच्या दिसांनी सुरू आशिल्ल्यान अपघातांच्या प्रमाणांत सुमारा भायर वाड जाल्ल्याचें दिसून येता.
अशीर रस्ते आनी वाहनांचे वाडिल्ले संख्येक लागून अपघातांचें प्रमाण वाडिल्ल्याचें दिसून येता. फोंडें वाठारांत फाटल्या 20 दिसांत घडिल्ल्या खूबशा अपघातांनी वट्ट 6 जाणांक मरण आयलें. ताका लागून वाठारांतल्या रस्त्याचो हुस्को वाडला. 23 मे दिसा टॉप कोला बोरी हांगा स्कुटर आनी म्हाल व्हरपी ट्रक हांचे मदीं जाल्ल्या अपघातांत स्कुटर चालकाक मरण आयिल्लें.
24 वेर कुट्टी उड्डाण पुलार केटीएम दुचाकीचो धपको लायटीच्या खांब्याक बसलो. हातूंत दुचाकी चालकाक जाग्यारूच मरण आयलें. उपरांत कांय वेळांत मापा-पंचवाडे ट्रक आनी टँकर हांचे मदीं जाल्ल्या अपघातांत टँकर लंवडलो आनी एका कामगाराक मरण आयिल्लें. 25 मे दिसा बेतोड्यां बायपास रस्त्यार दुचाकी आनी मोटार हांचे मदीं जाल्ल्या अपघातांत तरणाट्याक मरण आयिल्लें. 11 जून दिसा सकाळीं फोंड्यां कदंब बस स्टॅण्डार क्रेनी पोंदा चिड्डून मोटारसायकल पायलटाक मरण आयिल्लें. 11 जून दिसा रातीं उसगांवां फोंडकुलांक लागून स्कुटर रस्त्यार पडिल्ल्यान चालक गंभीर जखमी जाल्लो. जखमीचेर उपचार सुरू आसतना 12 जून दिसा सकाळीं मरण आयलें.
फोंडें वाठारांत खूबशे कडेन भुंयगत वीज वाहिन्यो घालपाचें काम सद्या घातक स्थिती निर्माण करता. भुंयगत वीज वाहिन्यो घाल्ले सुवातेर रस्तो नेमपाचे प्रकार घडत आसात. बेतोडें बायपास रस्त्याचे कुशीक माती व्हांवून गेल्ल्यान केबल दिसूंक लागल्यात. वाडटे अपघात पळयत जाल्यार अजून मेरेन बांदकाम खातें गंभीरतायेन रस्त्याच्या कामा कडेन लक्ष दिनाशिल्ल्याचें दिसून येता. काम करपा खातीतर कंत्राट दिले उपरांत बांदकाम खातें हात वयर करीत आसता. ताका लागून बेतोड्यां रुंदीकरण करतात त्या बायपास रस्त्यार एका वर्सांत 7 जाणांक अपघाती मरण आयलां.
मंगळारा रातीं उसगांव सावन तिस्क उसगांवां वता आसतना पावसांत फोंडकूल उदकान भरिल्ल्यान स्कुटर चालकाक फोंडकुलाचो अदमास आयलो ना. ताका लागून स्कुटर फोंडकुलांत गेले उपरांत चालक रस्त्यार पडून गंभीर जखमी जाल्लो. जखमी स्कुटर चालकाचेर गोमॅकाँत उपचार सुरू आसतना बुधवारा सकाळीं ताका मरण आयलें. घातक फोंडकुलाक लागून स्कुटर चालकाक जीव व्हगडावचो पडलो तरी अजून फोंडकूल पुरोवंक नाशिल्ल्यान थळावे लोक तिडक उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
