भांगरभूंय | प्रतिनिधी
क्रिस्तांव धर्मगुरू विशीं दुस्मानकाय वाडयिल्ल्याची पुलीस कागाळ
मडगांव, प्रतिनिधी : लोकसभा वेंचणुकेंत हारले उपरांत भाजपाचे म्हणयारे गिरीराज पै वेर्णेंकार आनी आमदार संकल्प आमोणकार हांणी पत्रकार परिशद घेवन क्रिस्तांव धर्मगुरुंक दोश दिवन दुस्मानकाय वाडोवपाचो यत्न केला. सासश्टींत क्रिस्तांव धर्मगुरुंच्या सांगण्यान कॉंग्रेसीक मतदान जाल्ल्याचें भाजपान सांगलें. लोकांच्या मनांत धर्मगुरू विशीं दुस्मानकाय वाडयिल्ल्या प्रकरणांत वेर्णेंकार आनी आमोणकार हांचे आड गुन्यांव नोंद करपाची मागणी कॉंग्रेस फुडारी गिरीश चोडणकार हांणी मडगांव पुलिशेंत कागाळी वरवीं केली.
चोडणकार हांणी कागाळींत म्हणलां, केंद्रांत आनी राज्यांत भाजपाचीच सत्ता आसा. मतांचें ध्रुवीकरण करपाचो यत्न जाला जाल्यार त्याच वेळार भाजपान कित्याक कागाळ करूंक ना? वेंचणुकेच्या काळांत आदर्श आचारसंहितेचे नेम मोडल्यार ताचेर कारवाय कित्याक करूंक ना? भाजप म्हणयारे गिरीराज हांणी भाजपाच्या वायट कामगिरीचो दोश क्रिस्तांव धर्मगुरुंचेर घालपाचो यत्न चलयला. भाजपान खुबदां क्रिस्तांव धर्मगुरुंचो हस्तक्षेप जाल्ल्यान कॉंग्रेसीक मतदान जाल्ल्याचीं वक्तव्यां केल्यांत. हातूंतल्यान वेंचणुके उपरांत समाजांत आनी धर्माधर्मां मदीं फूट पडपाची शक्यताय वाडत आसा. देखून धर्मीक भावना दुखोवप आनी समाजात फूट निर्माण करपाचो यत्न केल्ल्या प्रकरणांत गिरीराज पै वेर्णेंकार आनी संकल्प आमोणकार हांचेर गुन्यांव नोंद करचो, अशी मागणी चोडणकार हांणी मडगांव पुलिसां कडेन केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
