भांगरभूंय | प्रतिनिधी
नवी दिल्ली, खबरां संस्था : पावसाच्या दिसांनी सैमाची सोबीतकाय पळोवपाक पर्यटक भायर सरतात. लांब अंतर वचपा खातीर एक्सप्रेसवे वापरतात. पूण हायवेचेर टोल बुथांचेर लांब रांक पळोवन जायत्या जाणांचो मूड ऑफ जाता. अश्या पर्यटकां खातीर एक खोशेची खबर आसा. आतां टोल बुथाचेर लागपी रांको सोंपपाच्यो आसात. भारतीय राश्ट्रीय म्हामार्ग प्राधिकरणान टोल बुथांचेर आयटी प्रणाली आनी हार्डवेअरांत व्हड बदल करपाचो निर्णय घेतला. देखून फास्टॅगाचो वेव्हार बेगीन जातलो. टोल बुथांचेर लागपी वेळ वाटवतलो.
वेळ वांचतलो
सद्या गाडयेचेर आशिल्लो फास्टॅग वाचपाक बरोच वेळ लागता. केन्ना केन्नाय फास्टॅग कोड वाचना. अशा वेळार कर्मचार्यांक हातांत धरपाचीं साधनां वापरचीं पडटात. ताका लागून खूब वेळ पिड्ड्यार जाता. ताचेर उपाय सोदून काडला. आतां एनएचएआय दर्जेदार उपकरणां आनी सेवा पुरवणदारां कडल्यान खरेदी करतले. इलॅक्ट्रॉनिक्स आनी आयटी मंत्रालयांतल्यान प्रमाणपत्र मेळयले बगर हीं साधनां विकतीं घेवचीं ना.
STQC प्रमाणपत्र जाय
एनएचएआयची दुसरी कंपनी आयएचएमसीएलाच्या म्हणण्या प्रमाण आतां आरएफआयडी रीडर, एंटीना, ऑटोमेटिक नंबर प्लेट रीडर, टोल लेन कंट्रोलर आनी टोल प्लाझा सर्वरां खातीर Standardization testing and Quality Certificationची गरज आसतली. ह्या प्रमाणीत उपकरणांचो वापर टोल बुथांचेर जातलो. तातूंत कसलीय चूक जाल्यार अशा कंपनींक ब्लॅकलिस्टांत घालतले.
फास्टॅग रिचार्ज आपोआप जातलें
आरबीआयन ७ जून दिसा चलन धोरण समितीची बसका घेतली. तातूंत ई-देखभाल करपा खातीर नव्या फ्रेमवर्काची घोशणा केल्या. हाका लागून फास्टॅग आनी नॅशनल मोबिलिटी कार्डा खातीर आपोआप रिचार्ज करपाची सुविधा मेळटली. गिरायकांक आपोआप रिचार्ज करपाचो सप्तकी, म्हयन्याळो आनी दिसपट्टो पर्याय मेळटलो. गिरायकांक आपोआप रिचार्ज करपा खातीर रक्कम थारावची पडटा. थारायिल्ली राखीव रक्कम सोंपतकच फास्टॅग आपोआप रिचार्ज जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
