भांगरभूंय | प्रतिनिधी
सई टेंबेकर ही एक बरी गायिका. यु ट्युबाचे उपकार की आमकां असल्या कलाकारांचें गायन आयकुपाची संद मेळटा. अपलोड करिना फुडें एका सेकंदा भितर मेळटा.
सईन गाजिल्लीं हिंदी आनी मराठी पदां सादर केल्लीं पळोवंक मेळटा. पांच मिणटांत गायिका जे तरेन सूर, शब्द आनी भाव भावना ओतून आमचे मुखार मांडटा, तें काळजांत खोल खोल भेदून वता. आपणाक आवडिल्लीं धा मराठी गितां अशेय तिचे कांय भाग आसात. तातूंत सई आपणाक अमूक गीत कित्याक आवडलें, तातूंतले स्वर, तातूंतलो ठेको आनी ताची रचना, तातूंतले शब्द जिणेक मार्गदर्शक कशे थारले ताचेर भाश्य करून सांगता.
सईचें चाफा बोलेना, शुक्र तारा आनी हेर कांय मराठी गितां खूब आवडलीं. अभी ना जाओ छोडकर आनी हेर कांय हिंदी गितां खुबूच गोड.
सई भशेन आनीक खूब गायिका आनी कलाकार आनी नर्तक यु ट्युबाचेर आसात. यु ट्यूब व्हिडियो एक सारके ओतत आसतात. मारो कसो. तातूंतलें आपल्या आवडीचें, बरें तें पळोवचें. आतां बरें दर्जेदार कशें वळखुचें हें जाचे ताचे आवडीचेर आनी अभिरुचीचेर पातयेवन उरता.
डिजिटल तंत्रगिन्यानाच्या पर्वांत यु ट्यूब आनी यु ट्युबर फामाद जायत आसात. ताचो परिणाम हेर माध्यमांच्या सेवनाचेर जालाच. हालींच लोकसभा वेंचणुको जाल्यो. यु ट्युबाचेर वेंचणूक जावचे आदीं आनी निकाला दिसा आनी जातकच जीं समाचर व्हिडीयोचीं विश्लेशणां आयलीं तीं खोंटलोभर. तातूंत गांवांगांवांनी प्रादेशीक भासांनी जालींच. पूण थळावे बोली भाशेंत विक्सटावणी वितरायली. वितरायतात. लोकांक, मतदारांक चड करून निशेध, विरोधाचें उलोवप, निवेदनां, असंतोशाचीं वक्तव्यां चड आवडटात. देखून ह्या यु ट्युबरांनी ताचेरूच भर दिलो. लोक रुचीन तें पळेतात. कारण ती तांची तिडक वा भावना आसता. हाका जबर प्रतिसाद मेळ्ळो. यु ट्युबाचे फॉलोअर वाडले.
ही वितरावणी करपाक खबरां वाहिन्यां भशेन खास स्टुडियो, खास लायटी, खास कॅमेरा कांयच लागना. हुनार हून थंयचे थंयच. एक स्मार्टफोन. ताचेरूच लोकांच्याे मुलाखती, बायट रिकॉर्ड करप, डावनलोड केल्ल्या सॉफ्टवेअरा वरवीं संपादीत करप आनी वितरावप. ही सगली प्रक्रिया बीन कटकटीचीं आनी बीन खर्चाचीं.
ह्या यु ट्यूब वाहिनींचेर उलोवपी अॅंकर आनी निवेदक हेरां भशेन झांकून झांकून गांवकार जाले. ते तांच्या वाठारांतले मोठे स्टार जाले. ताची नोंद सगल्या माध्यमांक घेवचीच पडली. तांचो प्रेक्षक वर्ग आनी चाहतो वर्ग वाडत गेलो आनी आसा. हो आंकडो लाखांच्या घरांत आसा. पाल्हाळ जातले म्हूण तांची चिमटीभर लेगीत नांवांची वळेरी हांगा दिवं नजो.
कांय जाणांनी यु ट्युबा वेल्यान व्हिडियो घालून पयशे केले, प्रसिध्दी मेळयली. फक्त एक व्हिडियो यु ट्यूब वा ट्विटराचेर (एक्स) घालून कोट्यांनी रुपया मेळूं येता? हय. हीं फकांडां न्हय. ही गजाल खरी.
जगांतले सगल्यांत नामनेचे यु-ट्युबर अशी कीर्त आशिल्ल्या मिस्टर बिस्ट हांणी सांगलें की तांणी एक्स (पयलींचें ट्विटर) वेल्यान एक व्हिडियो पोस्ट करून 2.79 कोटी रुपया जोडले.
फाटल्या सप्तकांत ताची ही पोस्ट कोट्यांनी लोकांनी पळेली आनी जायरातदारांच्या माध्यमांतल्यान तांणी अडेज कोटी रुपयां परस अदीक येणावळ जोडली.
इंग्लीश, हिंदी, मराठी हे भाशेंतले यु ट्युबा वेले व्हिडियो पळेतकच दिसता, कोंकणी भाशेंतूय अशेच येवचे. अशाच दर्ज्याचे येवचे. अशीच प्रोफेशनल निर्मिती आशिल्ले येवचे. अशीच कन्टॅंट खोलाय आशिल्ले येवचे. अमृता सुभाष आनी ज्योती सुभाष हांचे कांय लघुपट आसात. खुबूच आशयसंपन्न आनी अभिनयाचें उंचेलें दर्शन घडोवपी. आदलीं गाजिल्लीं मराठी पदां आनी नॉस्टॅल्जीक हिंदी फिल्म गितां भुरगीं अप्रतीम शैलीन गातात. न्यूज म्हळ्यार बातम्यांचो आशय आनी तसले प्रोग्राम आसताच.
कोंकणीत कांयच घडूंक ना अशें न्हय. सुरवात जाल्या. आनीक जावपाची गरज आसा. वाव आसा. कोंकणी मनीस देशांत विदेशांत सगले कडेन आसा. ताका आपले भाशेचें प्रेम आसा. कोंकणींत व्हिडियो गितां आयल्यांत. बरें बरें चित्रिकरण करून हीं गितां घेतल्यांत. पूण गोंयचीं खाशेलीं थळां, गोंयचो लोकवेद, लोकगितां, गोंयचीं खाणां-जेवणां आनी रेसिपी हांचेर यु ट्युबार व्हिडियो येवपाक जाय. साहित्यिकांच्या ललीत निबंदांचें वाचन यु ट्युबाचेर चित्रां प्रतिमां सयत दाखोवं येता. वाचक वर्ग विस्तारतलो.
ए आय चो वापर यु ट्यूब व्हिडियो तयार करपा खातीर मोट्या प्रमाणांत जाता. ए आय हो एक यांत्रिकी इश्ट. ताच्यो कांय कल्पना अश्यो आसतात ज्यो आमकां हरशीं सुचनात. आमचे हेर इश्टूय मार्गदर्शन करूंक शकतात. गोंयांतल्या म्हज्या एका इश्टान एका मानेस्ताचे जिणेचेर लघुपट यु ट्यूबा खातीर करतना ताचें निवेदन ए आय स्रोता कडल्यान बरोवन घेतलें. उपरांत तें इंग्लीशींतल्यान कोंकणींत करून घेतलें. एलोन मस्क हो खूब कंपनीं सुरू करपी मोटो उद्देगपती, गुंतवणूकदार. ताचें हें वाक्य- “आमी मेळोवंक शकता ती मोलादीक गजाल म्हळ्यार प्रामाणीक अभिप्राय. तो क्रूर, गंभीर आसलो तरी”.
यु ट्युबरान ताचेर जे कमेंट म्हळ्यार अभिप्राय येतात ते फांफडून उडोवचे न्हय. अभिप्राय हा ब्रेकफास्टा सारको आसता. तो व्यक्तींच्या वाडी खातीर लावकारक थारता.
सुदारणा आनी प्रगती हांची खिळी निखळावपाची ही चावी. आमच्यो अपेक्षा आनी आमी साध्य केल्ले वास्तवीक परिणाम हांच्यांतलो अभिप्राय हो पूल. ताका वालोर दिवंक शिकुया.
अपरीपक्व लोकांक अभिप्राय म्हळ्यार वीख कशें दिसता. कोंकणीच्या मळार हें चड घडटा. आपलें उणें कितें ते विशीं दुसरो कितें सांगता तें आयकुपाची तयारी जाय. तेन्ना खरो विकास जाता. तो मागीर कोंकणीच्या यु ट्युबरांचो, यु ट्युबाचो वा ड्रोन आनी हेर तंत्रगिन्यान वापरून केल्ल्या चित्रिकरणाच्या व्हिडियोंचो आसूं.
मुकेश थळी
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
