दक्षीण गोंया खातीर जातलो सुरक्षा आराखडो

भांगरभूंय | प्रतिनिधी

लॉर्ना फर्नांडीसः जिल्हो पांवड्या वयले समितीची फुडल्या सप्तकांत बसका

भांगरभूंय । प्रतिनिधी

मडगांवः सर्वोच्च न्यायालयाचे रस्तो सुरक्षा समिती कडल्यान आयिल्ले सुचोवणे प्रमाण दक्षीण गोंया खातीर रस्तो सुरक्षा आराखडो तयार करतले. ते खातीर जिल्हो पांवड्या वयले समितींतले कांय वांगडी एकठांय येवन हे संबंदांत रस्तो सुरक्षा आराखडो तयार करतले. हे खातीर फुडल्या सप्तकांत बसका जातली. दक्षीण गोंयांतल्या बसस्टॅण्डा वयली परिस्थिती पळयत जाल्यार प्रवाशांचे सुरक्षे कडेन आडनदर जाल्ल्याचें दिसून येता. परतून परतून समस्या मांडून लेगीत ह्यो समस्या सोडोवंक नात. हाचेर चर्चा करपा खातीर खासा बसका घेवपाचें थारायलां, अशें गोवा कॅनाची लॉर्ना फर्नांडीस हांणी सांगलें.

रस्तो सुरक्षा समितीची बसका बुधवारा सकाळीं दक्षीण गोंय जिल्होधिकारी कार्यालयांत जाली. ह्या वेळार जिल्होधिकाऱ्याचे हाजिरेंत येरादारी, भौशीक बांदकाम खातें आनी हेर खात्यांचे प्रतिनिधी हाजीर आशिल्ले. हे बसके उपरांत फर्नांडीस उलयताली.

फाटल्या बसकां वेळार ज्या मुद्द्यांचेर चर्चा केल्ली, ताची फाटपुरवण हे बसकेचे सुरवेकूच केली. रस्तो रुंदीकरणाची गरज आशिल्ल्याचें हे आदींचे बसकेंत थारायिल्लें. ताचेर चर्चा केली. रावणफोंड जंक्शना वयले येरादारीचो विशय आयलो तेन्ना रस्त्याच्या रुंदीकरणा खातीर जमीन संपादीत करपाची गरज आशिल्ल्याचें सांगलें. ताका लागून तो विशय हे बसकेंत चर्चेक नाका अशें सांगलें. वेस्टर्न बायपासा वयली येरादारी आतां सुरू जावपाची आशिल्ल्यान येरादारीक आडखळीं निर्माण जातल्यो. तशेंच विवीध खात्या कडल्यान येरादारी सुरळीत जावचे खातीर परिपत्रकां जारी करतात, पूण ताची कोणाकूच म्हायती आसना. ताका लागून सगळीं परिपत्रकां एकेच सुवातेर येवची आनी बसकेंत ताचेर चर्चा जावपी, असो मुद्दो गोवा कॅना वतीन मांडिल्लो.

दक्षीण गोंयांतल्या रस्त्याचेर सोडटात त्या हेडग्यां गोरवांची समस्या ही सदांचीच जाल्या. हे समस्येक लागून खूब खेपे अपघात जातात, तरी लेगीत ताचेर ठोस उपाय येवजण जायना. एका खात्या कडल्यान दुसऱ्या खात्या कडेन बोट दाखोवपाचो प्रकार जाता. थळाव्या स्वराज्य संस्थांक वांगडा घेवन, गोशाळे वांगडा कबलात करून ह्या गोरवांची जतनाय घेवपाची गरज आसा. मात ताचेर लक्ष दवरले बगर हो प्रस्न सुटावो जावचो ना. ते खातीर थळाव्या स्वराज्य संस्थांक हे संबंदांतले निर्देश जारी करतले, अशें जिल्होधिकाऱ्यान सांगलें. दक्षीण गोंयांतल्या विवीध वाठारांनी सीसीटीव्ही कॅमेरा बसोवपाचें काम खासदार निधींतल्यान, सीएसआर निधींतल्यान जाले उपरांत ताची देखभाल दुरुस्ती जायना. ते प्रमाण दक्षीण गोंय जिल्होधिकारी कार्यालयांत देखरेख कक्ष तयार करपाचो मुद्दो लेगीत चर्चेक आयलो. तशेंच पालिका आनी पंचायतींक निर्देश दितले, अशेंय फर्नांडीस हांणी सांगलें.

सुरावली वाठारांत म्हयन्याभरांत स्पीडब्रेकर

रस्त्याचेर खंयच्या वाठारांत स्पीडब्रेकर जाय हाची थळावे लोकप्रतिनिधी आनी लोकां कडेन चर्चा करून कार्यकारकी अभियंत्यान निर्णय घेवचे, अशें थारायिल्लें. हे संबंदांतल्या परिपत्रका विशीं 23 ऑगस्ट 2023 ह्या दिसा घेतिल्ले बसकेंत थारायिल्लें. मात दुर्दैवान सुरावलेच्या अपघातांत तरणाट्याक जीव वगडावचो पडलो. आतां म्हयन्याभरांत त्या वाठारांतल्या रस्त्यांचेर स्पीडब्रेकर घालतले. रम्बलर आनी स्पीडब्रेकर घालतना थळाव्या लोकांक विस्वासांत घेवप आनी तांची उंचाय थारावप गरजेचें आसा, अशें बसकेंत चर्चेक आयलें, अशें लॉर्ना फर्नांडीस हांणी सांगलें.