भांगरभूंय | प्रतिनिधी
मोदींची गॅरंटी वेंचणुके उपरांतूय दिता आस्वासनांक पालव
पणजी, प्रतिनिधी : पासपोर्ट रद्द करपी दाखल्याचेर विदेशांत वचपा खातीरचो व्हिजा वा ओसीआय कार्ड दिवपी निर्णयाचो बर्याच गोंयकारांक लाव जातलो. गोंयकारांक थाकाय दिवपी निर्णय घेतिल्ल्यान हांव प्रधानमंत्री नरेंद्र मोदी आनी गृहमंत्री अमित शाह हांचे उपकार मानतां, अशें मुख्यमंत्री डॉ. प्रमोद सावंत हांणी म्हणलें.
विदेशांत नोकरी करपा खातीर बर्याच गोंयकारांनी पुर्तुगेज पासपोर्ट घेतल्या. भारतीय कायद्या प्रमाण तांचो भारताचो पासपोर्ट रद्द जाता. भारताचो पासपोर्ट रद्द जाल्ल्यान विदेशांत वचपा खातीर तांकां व्हिजा मेळ नाशिल्लो. व्हिजा मेळपाक आडखळ आसतना तांकां ओसीआय कार्डूय मेळनासलें. हो प्रस्न बरोच तेप आडकून आशिल्लो. पासपोर्ट रद्द जाल्ल्या दाखल्याचेर विदेशांत वचपी व्हिजा तशेंच ओसीआय कार्ड दिवपाचो निर्णय केंद्र सरकारान घेतला.
पुर्तुगेज पासपोर्ट धारकांचो व्हिजा मेळपाचो प्रस्न सुटावो जावपा खातीर राज्य सरकार बरोच तेप येत्न करतालें. मुख्यमंत्री सावंत हांणी लोकसभा वेंचणुके पयलीं केंद्रीय गृहमंत्री अमित शाह हांची भेट घेतिल्ली. मोदीची गॅरेंटी वेंचणुके उपरांतूय दिल्ली आस्वासनां पुराय करता, अशें मुख्यमंत्र्यान हे विशी प्रतिक्रीया उक्तायतना म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
