भांगरभूंय | प्रतिनिधी
लंडन, खबरां संस्थाः ब्रिटनाचें ऑक्सफर्ड विद्यापीठ 500 वर्सां पोरणी कांश्याची मूर्त भारताक परत करतलें. खबरां एजन्सीच्या म्हणण्या प्रमाण ही मूर्त सोळाव्या शेंकड्यांत तमिळनाडूंतल्या एका देवळांतल्यान चोरयेक गेल्ली. ही मूर्त संत तिरुमनकाई अलवराची आसा. दक्षीण भारतांतल्या बाराव्या अलवर संतांतलो संत तिरुमनकाई अलवर हो निमाणो संत.
सध्या ही मूर्त ऑक्सफर्ड विद्यापिठाच्या अॅशमोलीयन म्युझियमांत दवरल्या आनी ती पळोवपाक सुमार 1800 रुपया दिवचें पडटात. संत तिरुमनकाई अलवराची ही मूर्त 60 सेंमी उंच आसा. डॉ. जे. आर. बेल्मोंट हांणी 1967 वर्सा ही मूर्त ऑक्सफर्ड विद्यापिठांत दवरली.
11 मार्च 2024 दिसा ब्रिटनांतल्या भारतीय उच्चायुक्तान ही मूर्त तमिळनाडूंतल्या एका देवळांतली आशिल्ल्याचो पुरावो ऑक्सफर्ड विद्यापिठाक दिल्लो. ते उपरांत ऑक्सफर्ड विद्यापिठान ही मूर्त अंतर्गत चवकशी उपरांत भारतांक परत दितले अशें सांगिल्ले. आतां ही मूर्त धर्मादाय आयोगा मुखार दवरतले आनी तेच हे विशीं निमाणो निर्णय घेतले.
मूर्त भारतांतल्यान चोरिल्ल्याचे कशें कळ्ळें?
ऑक्सफर्ड विद्यापिठाच्या अॅशमोलीयन म्युझियमान सांगलां की, एका संशोधकान कोविड पयलीं ह्या मूर्त विशीं अभ्यास केल्लो तेन्ना पुराय खबर उक्ती जाली. हाचे उपरांत 2019 वर्सा ही म्हायती भारतीय उच्चायुक्ताक दिली. भारतीय उच्चायुक्तान ही म्हायती भारत सरकाराक दिली, उपरांत हे मूर्तीविशीं पुरावे एकठांय केल्ले.
तमिळनाडूंतल्या एका देवळांत 1957 वर्सा मेळिल्ल्या कांश्यान हे मूर्तीची खात्री जाली. हाचे उपरांत भारतान ऑक्सफर्ड विद्यापिठा मुखार पुरावे सादर केले आनी ही मूर्त परत करपाचो उलो मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
