भांगरभूंय | प्रतिनिधी
अयोध्या, खबरां संस्था: लोकसभा वेंचणुकेंत उत्तर प्रदेशांत भाजपाक धक्को बसला. राममंदिर पुराय जाले उपरांत उत्तर प्रदेशांतल्या लोकांनी भाजपाक न्हयकारल्या. अयोध्येंतूय भाजपाचो उमेदवार हारलो. ते उपरांत मोदी ३.० सरकाराचें काम सुरू जातांच अयोध्या खातीर व्हडलो निर्णय घेतला. अयोध्येंत राष्ट्रीय सुरक्षा रक्षक (एनएसजी) हब तयार करतले. दहशतवाद्यांचो धोको मतींत दवरून हो निर्णय घेतला. फाटल्या तीन दीस जम्मू-काश्मीरांत चालू आशिल्ल्या आतंकवादी हल्ल्यांक लागून देशांतल्या हेर संवेदनशील सुवातींनी खर सुरक्षा दवरल्या.
अयोध्येंत एनएसजी हब आसतलें
अयोध्येंत राममंदिर बांदल्या उपरांत सुरक्षा वेवस्थे संबंदीं सतत प्रस्न उप्रासता. ते खातीर केंद्र सरकारान राम देवळाची सुरक्षा वेवस्था खर करपाचेर लक्ष दिलां. २२ जानेवारी २०२४ दिसा अयोध्येक राम मंदिराचें उक्तावण जालें. ते उपरांत हांगा देशभरांतल्यान येवपी भक्तांची गर्दी व्हड प्रमाणांत वाडल्या. दर दिसा देड लाखां परस चड भक्त हांगा येतात. देखून सुरक्षा वेवस्था खर करपा खातीर पावलां उबारल्यांत. आतां केंद्र सरकारान एनएसजीक अयोध्याक हब करपाची येवजण तयार केल्या. एनसीजींत ब्लॅक कॅट कमांडो तैनात आसतात.
एनएसजी तैनात करपाचो निर्णय
केंद्र सरकारान अयोध्येंत एनएसजी कमांडो तैनात करपाचो निर्णय घेतला. अयोध्येक येवपी रामभक्तांच्या सुरक्षितताये खातीर गृह मंत्रालयान हो निर्णय घेतला. तशेंच आतंकवादी हल्ल्या सारकिल्ले परिस्थितीक तोंड दिवपा खातीर हे येवजणेचेर काम केलां. अयोध्या देवळाची सुरक्षा एनएसजीक दितले. खंयच्याय तरेच्या ऑपरेशनां खातीर एनएसजी सदांच तयार आसता.
सध्या अयोध्याची सुरक्षा एसएसएफ कडेन
अयोध्येक एनएसजीची नेमणूक करपा खातीर केंद्र सरकारान पुराय तयारी केल्या. हे संबंदी राज्य सरकाराक म्हायती दिल्या. एनएसजी हब खातीर जमनी संपादनाची प्रक्रिया सुरू केल्या. सध्या अयोध्येची सुरक्षा एसएसएफ हांकां दिल्या. ह्या कमांडोंक एनएसजीन प्रशिक्षण दिलां. स्पेशल फोर्साचे २०० कमांडो अयोध्येची सुरक्षा पळयतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
