भांगरभूंय | प्रतिनिधी
नवी दिल्ली, खबरां संस्था ः केंद्र सरकारान लेफ्टनंट जनरल उपेंद्र द्विवेदी हांची नवे लश्करी मुखेली म्हूण नेमणूक केल्या. 30 जून दिसा ते हें पद स्विकारतले. ह्या दिसा सध्याचे लश्करी मुखेल जनरल मनोज पांडे निवृत्त जातात. सध्या द्विवेदी हे लश्करी उपमुखेली आसात.
मध्य प्रदेशांतल्या रेवा हांगाचे सैनीक शाळेचे आदले विद्यार्थी लेफ्टनंट जनरल द्विवेदी हांची 1984 वर्सा 18 जम्मू-काश्मीर रायफल्सांत नेमणूक केल्ली. ते उपरांत ताणी ह्या युनिटाची कमान घेतली. नॉर्दर्न आनी वेस्टर्न ह्या दोनूय थिएटरांत समतोल अणभव आशिल्ल्याचे एक खाशेलपण जनरल ऑफिसराक आसा. उत्तर लश्करी सेनापती म्हणून आपल्या कार्यकाळांत लेफ्टनंट जनरल द्विवेदी हांणी जम्मू- काश्मीरांत गतीशील आतंकवाद विरोधी कारवाय करपा वांगडाच उत्तर आनी अस्तंत शिमे वयल्यान सेगीत ऑपरेशन्सचे नियोजन आनी अंमलबजावणी करपा खातीर धोरणात्मक मार्गदर्शन आनी ऑपरेशनल देखरेख दिली.
वादग्रस्त शिमेचो प्रस्न सोडोवपा खातीर चीना कडेन चालू आशिल्ल्या चर्चेत तांणी सक्रीयपणान वांटो घेतलो. लेफ्टनंट जनरल द्विवेदी हांकां अमेरिकेंत धाडलो. आर्मी वॉर कॉलेज, कार्लिस्ले, यूएसए 2017 त नॅशनल डिफेन्स कॉलेजीच्या समतुल्य अभ्यासक्रमांत तांका ‘डिस्टिंग्विश्ड फेलो’ पुरस्कार फावो जालो. ताणी संरक्षण आनी वेवस्थापन विशयात एम.फिल केलें. हाचेभायर स्ट्रॅटेजिक स्टडीज आनी लश्करी विज्ञान ह्यो दोन पदव्युत्तर पदवी मेळयल्यो.
30 जून दिसा पद स्विकारतले
जनरल मनोज पांडे हांकां 30 एप्रिल 2022 दिसा लश्करी मुखेली केलो. 31 मे 2024 दिसा ते निवृत्त जावपाचे आशिल्ले. पूण 26 मे 2024 दिसा मंत्रीमंडळाचे नेमणूक समितीन तांचे सेवेंत एक म्हन्याची मुजत वाड केली. आतां जनरल पांडे 30 जून 2024 मेरेन काम करतले. आनी उपरांत निवृत्त जातलें. आनी 30 जूनाक नवो लश्करी मुखेली म्हूण नेमिल्ले लेफ्टनंट जनरल उपेंद्र द्विवेदी पद स्विकारतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
