भांगरभूंय | प्रतिनिधी
मासीक पाळये वेळार राखपाची नितळसाण, सॅनेटरी नॅपकिनाचो वापर, ताचो विलो लावपाची म्हायती दिवप योग्य. शाळा पांवड्याचेर ते विशीं सगली म्हायती दिवपाक जाय.
मासीक पाळी ही बायलांचे जिणेचो वेगळावं नजं असो घटक. सैमा कडल्यान बायलांक मेळिल्लें हें वरदान. ताका लागून तीं नव्या जिवाक जल्म दिवपाक शकतात. हो संवसार चलोवं शकतात. आयची बायल दादल्यांच्या खांद्याक खांदो लावन येशाचे तेंगशेर पावल्या. घरची जापसालदारकी, भुरग्यांचो सांबाळ करून ती घर आनी नोकरी अशी तारे वयली कसरत करीत आसा.
चली भुरगें, बायलांक दर म्हयन्याक मासीक पाळी येता. थोड्यांक ती चार दीस पयलीं येता. पोटांत दुखता, फाटींत चडटा. पाळये वेळार भावनीक, शारिरीक लक्षणां दिसतात. मुखामळ उदास जाल्ले भशेन दिसता. थकपाक जाता. मासीक पाळी येता तेन्ना बायल भियेना. तिका एक प्रकाराची संवय जाल्ली आसता. आपल्याक जाता त्या त्रासाक ती हांसऱ्या मुखामळान तोंड दिता. घरांतली सगली जापसालदारकी सांबाळून ती आनंदान टापटीप जावन नोकरेक वता. आपल्या वाट्याक आयिल्लें काम वेळार करता. मासीक पाळी आसा म्हूण ती आळसाय करीना, तिचो धीर खचना.
मासीक पाळी अपवित्र, लज दिसपा सारकी अशें समजप सामकें चुकीचें. ही सोंपेपणी उलोवपा सारकी गजाल न्हय, ही जबाबदारी. ती एक बायल सहज निभावपाक शकता. आयज मेरेन हें ती करीत आयल्या. मासीक पाळी आनी नितळसाण ह्या विशयाचेर जागरुकताय कार्यावळीचें आयोजन करप बरें. बायलां मदीं गर्भाशयाच्या तोंडाच्या कॅन्सरा विशीं जागरुकताय पातळवप, ताचे भलायकी विशीं सर्वांगी दृश्टीकोन वाडोवप. अर्थीक योगदानांत बायलांक वांटेकार करून घेवप, भलायके विशीं, वैजकी उपचारां विशीं तांकां मार्गदर्शन करप, संवाद, भाशणां, समुपदेशन करप …. असले उपक्रम चालीक लावप खरेंच बरें.
मासीक पाळये वेळार राखपाची नितळसाण, सॅनेटरी नॅपकिनाचो वापर, ताचो विलो लावपाची म्हायती दिवप योग्य. शाळा पांवड्याचेर ते विशीं सगली म्हायती दिवपाक जाय. गांवगिऱ्या वाठारांनी सॅनेटरी नॅपकिनाचें फुकट वांटप करपाक जाय. मासीक पाळी हें कसलें दुयेंस न्हय, हें प्रत्येक बायलेन आनी दादल्यांनीय लक्षांत दवरपाक जाय. कोणा बायलेक ह्या काळांत चड त्रास जालो जाल्यार तिणें घरा रावन सुशेग घेवपाक जाय.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
