भांगरभूंय | प्रतिनिधी
भाजयेचें मोल वाडिल्ल्यान ‘वेज थाळी’य जाली म्हारग
नवी दिल्ली, खबरां संस्था : फाटलें वर्सभर म्हारगाय बरीच वाडल्या. म्हारगाय दर हो ५ टक्क्यां मेरेन गेला. जेवण, धान्याचे म्हारगायेंतूय कसलोच उणाव जावंक ना. फाटलें वर्सभर बटाट, कांदे आनी टोमॅटोच्या दरांत ८१ टक्क्यांनी वाड जाल्या. ताका लागून व्हेज थाळीचे किंमतींतूय वाड जाल्ल्याचें पळोवपाक मेळटा.
मेळिल्ले म्हायती प्रमाण, फाटल्या पंदरा दिसांनी कांद्याच्या दरांत ५० टक्क्यां मेरेन वाड जाल्या. गिरायक वेव्हार मंत्रालयाचे वेबसायटीचे आंकडेवारीचेर नदर घाली काय, फाटलें वर्सभर बटाट, कांदे आनी टोमॅटोचे किंमतीत ८१ टक्क्यां मेरेन वाड जाल्ली दिसता. देशभरांत ह्या तिनूय भाजयांच्या सरासरी दरांत बरीच वाड जाल्या.
खंयच्या पिकाच्या दरांत वाड जाली?
वेबसायटी प्रमाण, ३० एप्रिल २०२३ दिसा बटाटांची सरासरी किंमत १८.८८ रुपया प्रती किलो आशिल्ली. जी १० जून २०२४ मेरेन ३०.५७ रुपया प्रति किलाचेर पावल्या. म्हळ्यार बटाटाच्या दरांत किल फाटल्यान ११.६९ रुपयांची वाड जाल्या. हाचो अर्थ फाटले वर्सभर बटाटांचें दर ६२ टक्यांनी वाडलां. फाटलें वर्सभर कांद्याच्या दरांत १३.५० रुपयांची वाड जाल्या. ३० एप्रिल २०२३ दिसा कांद्याची सरासरी किंमत २०.४१ रुपया किल आशिल्ली. जें १० जून दिसा ३३.९८ रुपया जाल्यात. हाचो अर्थ फाटल्या एका वर्सांत कांद्याच्या दरांत ६६ टक्के म्हळ्यार १३.५७ रुपया प्रतिकिल वाड जाल्या.
टोमॅटोचेय किंमतींत वाड
फाटल्या वर्सभरांत टोमॅटोच्या दरांत वाड जाल्या. हें मोल ६० टक्क्यां परस चड वाडलां. बटाट आनी कांद्याचे तुळेंत टोमॅटोच्या दरांत सगळ्यांत चड वाड जाल्या. ३० एप्रिल २०२३ दिसा टोमॅटोची किरकोळ किंमत २०.५५ रुपया प्रति किलो आशिल्ली. १० जून २०२४ दिसा ह्या टोमॅटोची किंमत ३७.११ रुपयां मेरेन गेल्या. हाचो अर्थ टोमॅटोचे किमतींत फाटल्या वर्सभरांत ८१ टक्के म्हळ्यार १६.५६ रुपया प्रतिकिलो वाड जाल्या.
ऑनलायन प्लॅटफॉर्माचे किंमती प्रमाण, ३० रुपया किल विकपी बटाट ४१ रुपया किलो दरान विकता. जाल्यार कांदो ४३ ते ४७ रुपयांनी किल विकतात. हे दर वाडीक लागून शिवराक थाळयेचेंय मोल वाडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
