भांगरभूंय | प्रतिनिधी
नवी दिल्ली, खबरां संस्था ः आतां तंत्रगिन्यानाचें युग चालू आसा. केन्ना केन्ना बँके कडेन संबंदीत कांय कामां करपाक पुराय दीस वतालो. पूण आतां मोबायल वा इंटरनॅट बँकिंगांतल्यान पयशांचे वेव्हार सेकंदां भितर पुराय करपाक मेळटात. यूपीआयच्या मजतीन ऑनलायन पयशांचे वेव्हार आनीक सोंपें जालां. ऑनलायन पेमेंटाच्या मळार दर दिसा नवे बदल घडत आसात. सध्या ऑनलायन पेमेंट प्लॅटफॉर्म गूगल पेन व्हडलो निर्णय घेतला. सध्या गूगल पे अॅप एका देशांत बंद केलां.
मेळिल्ले म्हायती प्रमाण, अमेरिकेंत गूगल पे अॅप 4 जून 2024 सावन बंद केलां. ऑनलायन वेव्हारा खातीर गूगल पे अॅप सुरक्षीत मानतात. भारतांत दुसरो सगळ्यांत चड वापरांत आशिल्लो हो अॅप. ह्या प्रकरणांत अमेरिकेंत हो अॅप बंद करपाचें कारण कितें? अमेरिकेंतल्या गूगल कंपनी कडल्यान गूगल वॉलेटाचो प्रचार सुरु आसा. तशेंच ऑनलायन पेमेंट आनीक सोंपें करपा खातीर गूगलाचे यत्न सुरू आसात. ह्या कारणाक लागून अमेरिकेंत गूगल पे बंद जाला अशें म्हणटात.
ह्या निर्णया उपरांत फुडें कितें जातलें?
अमेरिकेंत गूगल पे बंद करपाचो निर्णय घेतला. ताका लागून गूगल पे वापरपी लोकांक थेट गूगल वॉलेट वापरपाक सुरवात करची पडटली. कंपनीन आदीं सांगिल्ले प्रमाण, फुडाराक 180 देशांनी गूगल पे बदला गूगल वॉलेट चालू उरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
