भांगरभूंय | प्रतिनिधी
पालघर, खबरां संस्था: इश्टीणीच्या घरांत मोगाक विरोध आशिल्ल्याचें कारण मनांत दवरून ताणें तिडकीन तिचे तकलेर फातर घालून तिका मारून उडयल्ल्याची घडणूक पालघर तालुक्यांतल्या मुरबे हांगा घडली. स्नेहा पुरुषोत्तम चौधरी (१९) अशें मरण आयिल्ले चलयेचें नांव. जाल्यार तिच्या इश्टाचें नांव सुमित तांडेल (२१) अशें आसा. स्नेहाचो खून करून फरारी जाल्ल्या सुमिताक सोमारा सांजेवेळार सातपाटी हांगा पुलिसांनी अटक केली.
स्नेहा आनी सुमित हीं दोगांय मुरबे गांवांत रावपी. तारापूर उद्देगीक वसणुकेंतल्या कारखान्यांत तीं काम करतालीं. सोमारा सकाळीं सदचे वरीं सकाळीं ८ वरांचेर तीं दोगांय कामाक वचपाक भायर सरलीं. मात, मदींच कुंभवली गांवां लागसारा रस्त्याचेर त्या दोगांय मदीं झगडें पेटलें. ह्या झगड्या मजगतीं सुमितान स्नेहाचे तकलेर फातर घालून ताका तशेंच थंय सांडून पळ काडलो.
ताचे पयलीं, थंय जमिल्ल्या लोकांनी तांचे मदीं पेटिल्लें झगडें सोडोवपाचो यत्न केलो. स्नेहाक उपचारा खातीर हॉस्पिटलांत व्हरतां अशें सांगून सुमित ताका दुचाकीचेर बसोवन एकलारे गांवां लागसारच्या खाजण वाठारांत घेवन गेलो. उपरांत स्नेहाची कूड खाजण वाठारांत पुलिसांक सांपडली. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
