भांगरभूंय | प्रतिनिधी
म्हापशें, प्रतिनिधी ः आसगांवां घरा मुखार पार्क केल्ले आय- 20 मोटारीक उजो लागून 5 लाखांचें लुकसाण जालां. मोटारीच्या धनयान हो घातपात आशिल्ल्याचो दुबाव उक्तायला.
ही घडणूक सोमारा 10 तारखेक सकाळीं 3 वरांचे सुमाराक घडली. राजेश नायक हांणी आपली आय 20 मोटार जीए 03 व्हाय 7285 क्रमांकाची आपल्या घरा मुखार उक्त्या सुवातेर पार्क केल्ली. मोटारीक फाटल्यांच्यान उजो लागलो आनी पुराय मोटार उज्यात लासली. हांतूत 5 लाखांचें लुकसाण जाले.
हे घडणुकेची म्हायती मेळटकच म्हापशें उजो पालोवपी दळाचे हवालदार विष्णु गावस, प्रशांत सावंत, सखाराम गांवकार, अभिजीत काळोजी आनी अशोक वळवईकार हांणी घडणुक सुवातेर येवन उजो पालयलो.
मोटारीच्या धनयान हो घातपात आशिल्ल्याचो दुबाव उक्तायला. कारण मोटारीच्या इंजिनाचो भाग जळूंक ना ते खातीर शार्ट सर्किटाचो प्रस्न उप्रासना अशें तांचें मत आसा. हणजूण्यां पुलिसांनी हे घडणुकेचो पंचनामो केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
