भांगरभूंय | प्रतिनिधी
नवी दिल्ली, खबरां संस्था: लोकसभा वेंचणुकेंत एनडीएक भोवमत मेळ्ळ्या उपरांत आयतारा नरेंद्र मोदी हांणी तिसरे खेपे प्रधानमंत्री म्हणून सोपूत घेतलो. एनडीच्या सुमार ७२ खासदारांनीय ह्या वेळार सोपूत घेतलो. नरेंद्र मोदी हांणी आयज प्रधानमंत्री पदाचो ताबो घेतलो. तांणी शेतकारां खातीर व्हडलो निर्णय घेतलो. पीएम किसान येवजणेचे १७ व्या हप्त्याचे फायलीचेर तांणी सय केली. ताका लागून कोट्यांनी शेतकारांच्या खात्यांत २० हजार कोटी रुपया जमा जातले.
केंद्रांत एनडीए सरकार आयले उपरांत शेतकारां खातीर घेतिल्लो हो पयलो निर्णय. मजगतीं, ह्या निर्णयाचो देशांतल्या ९.३ कोटी शेतकारांक फायदो जातलो. हातूंत सतराव्या हप्त्यांत सुमार २० हजार कोटी रुपयांची रक्कम शेतकारांच्या बँक खात्यांत येतली.
मजगतीं, पीएम किसान येवजणे वरवीं लावार्थी शेतकारांक तीन समान हप्त्यांनी दरेकीं २ हजार रुपया दितात. म्हळ्यार तांकां ६ हजार रुपया एका वर्सांत मेळटात. ही येवजण २४ फेब्रुवारी २०१९ लोकसभा वेंचणुके आदीं सुरू केल्या. ही येवजण आजून चालू आसा आनी आतां एनडीए सरकार परतून सत्तेर आयले उपरांत पीएम किसान येवजणे संबंदी पयलो निर्णय घेतला. शेतकारांचो सतरावो हप्तो (२ हजार रुपया) बँक खात्यांत सरळ जमा जाल्यात.
मजगतीं, आतां मेरेन शेतकारांक पीएम- किसान येवजणेचे १६ हप्ते मेळ्ळ्यात. सोळावो हप्तो मेळिल्ल्या ९.०३ कोटी शेतकारांतले २.०३ कोटी शेतकार उत्तर प्रदेशांतले आसात. जाल्यार महाराष्ट्रांत ८९.६६ लाख, मध्य प्रदेशांत ७९.९.३ लाख, बिहारांत ७५.७९ लाख आनी राजस्थानांतले ६२.६६ लाख आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
