भांगरभूंय | प्रतिनिधी
प्रतिनिधी । भांगरभूंय
ताळगांवच्या शेतांनी सिवरेजीचें घाणयारें उदक सोडपाचे प्रकार चल्ल्यात ते बंद उडयतले. हे खातीर ताळगांव पंचायतीन पावलां उखलपाक सुरवात केल्या, अशे ताळगावचे आदले सरपंच आनी पंच जानू रोजारियो हांणी सांगलें.
ताळगांव पंचायतीचे वतीन शेतकारांक भाताचें बीं आनी सारें वांटप जालें. ह्या सुवाळ्याक ताळगांवची सरपंच मारिया फर्नांडीस, उपसरपंच सागर बांदेकार, तिसवाडी शेतकी अधिकारी यशवंत गावस आनी हेर पंच वांगडी हजर आशिल्ले. कार्यावळीचें उक्तावणा वेळार रोजारीयो उलयतालो.
आमी ताळगांवा नवे सिवरेजीचें पंपीग स्टेशन घाला. देखून शेतांनी सिवरेज सोडपाचे प्रकार हाचे फुडें पुराय बंद जातले. मुख्यमंत्री डाॅ. प्रमोद सावंत हांणी ताळगांवच्या शेतांची पळोवणी करून सिवरेज सोडपाचे प्रकार बंद करपाचे आदेश पंचायतींक दिल्ले. ते नुसार फाटलीं पांच वर्सां आमी तपासणी करून खंयची इमारत सिवरेज सोडटा तें पळयतात, अशें रोजारियो हांणी सांगलें.
शेतकारांक कितें कश्ट भोगचे पडटात तें आमकां खबर आसा. देखून तांकां कसले त्रास जातात जाल्यार तांणी ते उलोवन दाखोवचे. तुमचे प्रस्न सोडवपा खातीर फुडें येयात, पंचायत तुमकां पुराय तेंको दितली, अशे रोजारियो हांणी सांगलें.
क्षेत्रीय शेतकी अधिकारी यशवंत गांवस हांणी शेतकारांक मार्गदर्शन केलें. शेतकारांनी कृशी कार्ड करूंकना तांणी तें बेगीनच करून शेतकी खात्याचे येवजणे लाव घेवचो. बी, सारें, यंत्रणा, भाडयान ट्रॅक्टर, किडनाशक, शेतांक वंय मारपाक सबसीडी दितात. ते भायर सैमीक आपत्ती वेळार सरकार शेतकारांक अर्थीक मजतय दिता. शेतकारांनी केंद्र आनी राज्य सरकाराच्या येवजण्यांचो लाव घेवचो असो उलो शेतकी अधिकाऱ्यान मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
