भांगरभूंय | प्रतिनिधी
विलनियस, खबरां संस्था ः विद्यापिठांत फुकट शिक्षण, रोजगारांच्यो संदी, बरो पगार, सुखद वातावरण, उणें भाडें आदी कारणांक लागून वर्ल्ड हॅपीनेस इंडेक्सांत युरोपी देश लिथुआनियाचे तरणाटे सगळ्यांत चड खोशी आशिल्ल्याचें मानतात. पूण बऱ्याच काळा पयलीं अशें नाशिल्लें. 11 मार्च 1990 दिसा सोव्हिएत संघातल्यान भायर पडिल्ल्या लिथुआनियान शिक्षणाचेर भर दिवन बेरोजगारी पयस केली.
लिथुआनियाच्या विलनियस विद्यापिठांत मानसशास्त्राचे प्रा. अनटानस कॅरिज हांणी म्हणलें तरणाट्यां खातीर लिथुआनिया हो सगळ्यांत बरो देश. हांगाच्या तरणाट्यांक जायत्यो संदी आसात. सोव्हिएत संघाच्या विघटना उपरांत फाटल्या 34 वर्सांत देशाची समृद्धी थीरपणान वाडत आसा. पयशे ना जाल्यार युनिव्हर्सिटींत फुकट शिकपाक मेळटा. हाकाच लागून देशांतल्या 57% तरणाट्यांक विद्यापीठ पातळेचेर शिक्षण मेळटा. आनी ह्या शिक्षणा उपरांत तांचेर कसल्याच प्रकारच्या रिणाचो भार नासता. तांकां तांचे आवडीचें काम करपाचें स्वातंत्र्य आसा. तरणाट्यां खातीर रोजगाराच्यो खूब संदी आसात. हांगा पगार बरे आसात. 2010 वर्साचे तुळेंत 2022 वर्सा भाडें 144% वाडलें, जें ॲस्टोनिया उपरांत युरोपीय संघांत सगळ्यांत चड आसा. तरी लेगीत हेर युरोपीय देशां परस भाडें खूब उणें आसा. देशांतलीं हॉटेलां आनी रेस्टॉरंटांय खूब सवाय आसात. तरणाट्यांक हो खर्च सहजपणान परवडटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
