भांगरभूंय | प्रतिनिधी
आयचे वेगान बदलपी जिणे पद्दतीक लागून जायत्यो समस्या निर्माण जातात. ८ ते ९ वरां बसल्यार वजनूय वेगान वाडटा. हाचे भायर शारिरीक समस्याय मुखार येतात. अशे स्थितींत कुडीक व्यायामाची सामकी गरज आसता. हाका लागून वजन नियंत्रणांत उरता, वांगडा दुयेंसांचोय धोको उणो जाता. व्यायाम केल्यार आमी शारिरीक आनी मानसीक नदरेन बरीं उरतात. मात आयचे व्यस्त जिणे पद्दतीक लागून लोकांक वर्कआवट करपाक वेळ मेळप मात्शें कठीण जालां. फकत सकाळीं व्यायाम केल्यार कुडीक आदार जातलो अशें कांय जाणांचें मत आसता. पूण अशें कांयच ना. सांजवेळार व्यायाम केल्यारूय तितलेच फायदे जातात.
सांजवेळार व्यायाम करप हो एक बरो पर्याय. सांजवेळार व्यायाम केल्यार व्यायाम करपाक चड वेळ मेळटा. दिसाचें काम सोंपतकच सांजवेळार विसव घेवपाक मेळटा आनी व्यायामूय करपाक मेळटा. सेगीत विचार करून व्यायाम केल्यार कसलोच फायदो जायना.
सकाळीं व्यायाम करतना तुमचे कुडीक वॉर्मअप करपाची गरज आसता. कारण न्हिदेंतल्यान जागे जाले उपरांत कुडींतली एकंदर उर्जेची पातळी उणी जाता. मात सांजवेळार व्यायाम केल्यार वॉर्मअप करपाची गरज ना. सांजवेळार चड बरो व्यायाम करूं येता.
व्यायाम केल्यार ताण पयस जाता. ताण पयस करपाक व्यायाम हो एक बरो पर्याय. आयची व्यस्त जीण आनी जिणे पद्दतीक लागून मनशाचेर ताण येता. सांजवेळार व्यायाम केल्यार पुराय दीस थकिल्ली कूड आनी ताण पयस उरता. व्यायामाक लागून स्ट्रेस हार्मोन उणे जातात. ताका लागून तुमकां चड रिलेक्स दिसता.
दिसपट्ट्या कामाक लागून रातची बरी न्हीद येना. अशे तरेन सांजवेळार व्यायाम केल्यार ताण सोंपता आनी रातची सुशेगाद न्हीद येता. सांजवेळार व्यायाम केल्यार स्नायू शिथील जातात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
