भांगरभूंय | प्रतिनिधी
रक्तपाता बगर लोकांचे अर्थीक आनी समाजीक जिणेंत क्रांतीकारी बदल घडोवन हाडपी शासन वेवस्थेच्या प्रकाराक आनी पद्दतीक लोकशाय म्हणटात. संविधानाचे शिल्पकार डाॅ. बाबासाहेब आंबेडकर हांणी केल्ली ही लोकशायेची व्याख्या. काल संवसारांतल्या ह्या सगल्यांत व्हडल्या लोकशाय देशांत एका नव्या पर्वाची नांदी जाली. नरेंद्र मोदी हांणी प्रधानमंत्री म्हूण फाटोफाट तिसरे खेपे सोपूत घेतलो. हो एक इतिहासीक खीण. मोदी हांच्या मंत्रीमंडळांतल्या वांगड्यांनीय सोपूत घेतलो. विकसीत भारताचें सपन साकारपाक, देशांत अर्थीक, समाजीक न्याय स्थापन करपाक नवें केंद्र सरकार आयच्यान वावुरतलें. आमची अर्थवेवस्था, वट्ट देशी उत्पादन वयर काडून देशाक संवसारांतली तिसऱ्या क्रमांकाची म्हासत्ता करपाचो हावेस हाचे पयलीं उक्तायिल्लो, तो पूर्ण करपाक एनडीए सरकाराक आतां वावराक लागचें पडटलें. वांगडा तेलगू देसम, जनता दल युनायटेड आनी हेर घटक पक्षांची मजत मेळटलीच.
एनडीए सरकारांत 72 मंत्री आसात. तातूंतले 30 कॅबिनेट मंत्री, तर 5 जाणांक स्वतंत्र कार्यभार दितले. 36 राज्यमंत्री आसतले. तांची खातीं रोखडींच जाहीर जातलीं. एकाच मतदारसंघांत फाटोफाट स खेपे वेंचून येवपाचो विक्रम करपी आमचे गोंयचे खासदार श्रीपाद नायक हांकां परत राज्यमंत्रीच केल्यात. भाजपाचे ते म्हालगडे फुडारी. सेगीत 25 वर्सां खासदार जावपाचो विक्रम करपी खूब थोडे लोकप्रतिनिधी आसात. तांकां कॅबिनेट मंत्रीपद फावतालें. मध्यप्रदेशाचे आदले मुख्यमंत्री शिवराजसिंह चौहान ह्या मंत्रीमंडळांत आसात. खेळां मंत्री अनुराग ठाकूर नात.
प्रधानमंत्री नरेंद्र मोदी फाटले खेप सत्तेर आशिल्ले, तेन्ना भाजपा कडेन स्पश्ट भोवमत आशिल्लें. मात हे खेप तांकां हेर पक्षांचो तेंको घेवचो पडलो. नीतिश कुमार, चंद्रबाबू नायडू हांचो आपल्या वांगड्यांक खाशेलीं मंत्रीपदां दिवपाचो आग्रो आसतलो. आपल्या राज्यां खातीर खाशेल्यो सुविधाय ते मागतले. एनडीए सरकाराक हाचो अर्थीक वा हेर कसलोच त्रास जावचो ना. बाकीचे घटक पक्ष अस्वस्थ जावचे नात, हाची जतनाय फुडारपण करपी भाजपाक घेवची पडटली. ह्या दोनूय राज्यांक खाशेलो दर्जो जाय. तेलगू देसम पक्षान मुस्लीम आरक्षणाचें समर्थन प्रचारा वेळार आनी ताचे पयलीं केलां. जनता दल युनायटेडान जातीय जनगणनेचें समर्थन केलां. हे दोनूय पक्ष ते मुद्दे कांय वर्सां खुटयाळ्याक लायतात काय ताचो आग्रो धरतात, ताचे कडेनूय राजकी पक्ष, मतदारांचें लक्ष आसतलें.
सरकारा मुखार बरींच आव्हानां आसात. सामान्य भौसाक सतावपी, तांचेर थेट परिणाम करपी एक गजाल म्हणल्यार म्हारगाय. पयलीं सावन सगल्या सरकारांनी ती उणी करपाचो यत्न केलो. गरिबी ना करपाकूय पावलां उखल्लीं. मात हे घटकेक पसून म्हारगाय उणी जावंक ना. प्रत्येक काळांत म्हारगाय ही आसताच आनी तेन्नाच्या भौसाक ती सतायताच. आयज खास करून रांदपाचो गॅस, इंधन, भाजी, फळां, कड्डण हांचें मोल मळबाक तेंकलां. ताचेर नियंत्रण दवरपाक नव्या सरकाराक कसरत करची पडटली. विदेशी संबंदांचें व्हडलें आव्हान आसतलें. नरेंद्र मोदी फाटलीं 10 वर्सां प्रधानमंत्री आसात. तांणी विवीध देशां कडेन बरे संबंद निर्माण केल्यात. ती प्रतिमा तिगोवन धरतनाच चीन आनी पाकिस्तानाचेर खास नदर जाय. कारण हें दोनूय देश अजून गरज नासतना भारताची कळ काडटात. चीन तर चडूच. मुत्सदेगिरी, विदेशी संबंद वापरून चीनाक थंड करचोच पडटलो.
नव्या सरकारा मुखार आशिल्लें बेकारी हें आनीक एक आव्हान. ती नश्ट करीत जाल्यार देशा मुखार आशिल्ले अर्दे प्रस्न सुटावे जातले. देशाची अर्थवेवस्था, गरिबी सुदारतली. कारण नोकरी मेळटकच तरणाटे खर्च करपाक लागतले. सगल्यांकूच सरकारी नोकरी दिवप शक्य ना. खाजगी मळाचेरुय तरणाट्यांचे कुवती प्रमाण तांकां नोकरी मेळटली हें खातीर यत्न करचे पडटले. धंदो, वेवसाय करपांत कांय राज्यांतले तरणाटे मुखार आसात. सगलेच कडेन हें चित्र दिसचें हे खातीर सरकाराक पावलां उखलचीं पडटलीं. स्टार्ट अप इंडिया, मेक इन इंडिया सारक्या येवजण्यांक नव्यान बळगें दिवचें पडटलें.
मध्यवर्गीय हो देशांतलो म्हत्वाचो घटक. लोकसंख्येनूय तो चड आसा. तांचो जिणे पांवडो उंचावपाक, तांची अर्थीक बचत वाडोवपाक खाशेले यत्न करपाची इत्सा प्रधानमंत्री मोदी हांणी दोन दिसां वयलीं युती पक्षांचे बसकेंत उक्तायल्या. तांचे खातीर अर्थीक मळाचेर म्हत्वाचे बदल जावं येतात. शेतकारांचे प्रस्नूय सोडोवचे पडटलें. आरक्षणाचो प्रस्न महाराष्ट्रा सयत कांय राज्यांनी आसा. जायत्यो समस्या, आव्हानां, प्रस्न नव्या सरकारा मुखार आसात. तांचेर सगल्यांक मानवतले अशे उपाय काडपाक एनडीएच्या घटक पक्षांक सांगाताक घेवन सरकाराक मुखार पावलां मारचीं पडटलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
