भांगरभूंय | प्रतिनिधी
हरमल वाठारांतले वेवसाय १९६१ वर्सा आदले
हरमल, बातमीदार: दर्यादेग वाठारांत कायम स्वरुपाचे वेवसाय आसात. हे वेवसाय १९६१ वर्सा आदले आनी थळाव्यांचे आसात. तांच्या स्वताचे जमनीर आशिल्ल्यान सरकाराचें शुल्क भरपूय चालू आसा. ताका लागून बोगस आनी फटींग कागाळी भायर मारपाची मागणी करपी थाराव ग्रामस्थांनी खासा ग्रामसभेंत संमत केला.
मजगतीं, दर्यादेग वाठारांतलीं हॉटेलां, २१ इमारती बेकायदेशीर आसात अशी बोगस कागाळ करपी पत्र पंचायतींत आयले उपरांत ताची ग्रामस्थांनी ग्रामसभेंत दखल घेतली.
सुरवातेक ही कागाळ न्यायालया कडल्यान आयिल्ल्याची पंचायत सचीव सुभाष कांबळे हांणी हाजीर आशिल्ल्या सगळ्यांक सांगलें. हे ग्रामसभेंत सरपंच रजनी इब्रामपुरकार, उपसरपंच अनुपमा मयेंकार, पंच सोनाली माज्जी, संतान फर्नांडीस, सुशांत गावडे, दिव्या गडेकार, भिकाजी नायक हाजीर आशिल्ले.
आयिल्ले कागाळीचे प्रतीचेर नांव, गांव आनी सय ना, मात आमी ताचे आड कागाळ दाखल करतले. ह्या गांवांत लोक गोंय मुक्ती आदीं पसून रावतात. तशेंच सीआर झेड कायदो अस्तित्वांत येवचे पयलीं ग्रामस्थांचे वेवसाय सुरू आसा. तातूंत एक सोडून हेर सगळे थळावे वेवसायीक आशिल्ल्याचें थारावांत नमूद केलां.
ह्या वेवसायां कडेन संबंदीत गरजेचो शुल्क पंचायत खात्यांत जमा करतात. तशेंच घरपट्टी, लायट, उदक, वेवसाय शुल्क, गेस्ट हावज शुल्क, कोयर शुल्क जेवण आनी वखद संचालनालय, पर्यटन, उजो पालोवपी आनी प्रदूशण खात्यात जमा करता अशें ग्रामस्थांनी सांगून बोगस कागाळदाराचो हेत अशुद्ध आसा. ताका लागून कागाळ रद्द करची अशें ग्रामस्थांनी दिल्ल्या थारावांत म्हणलां.
गोंय मुक्ती आदीं पसून हांगचे लोक हांगा रावतात. तांचो जल्म, मरण हांगाच जाल्ल्याचो दाखलो आसा. सुमार १९७०- ८० च्या दसकांत च्या स्टॉल, भाजयेचे गाडे आनी स्वता खोपींत रावन घरां भाड्याक दिवन कुटुंबाचें पोट चलयलें. ताका लागून हे बोगस कागाळीचो हे गांवांतलो धर्मीक एकवट इबाडपाचो हेतू आशिल्ल्याचें दिसून येता. अशे तरेच्यो कागाळी कायमच्यो रद्द करच्यो अशेंय म्हणलां.
मजगतीं, एखाद्रे कागाळीची दखल पटोवन घेतात. मात जेन्ना कागाळ करपी व्यक्ती हाजीर नासता तेन्ना पंचायत एकेच वटयां पळोवणी करता अशें आदले पंच प्रविण वायंगणकार हांणी निदर्शनाक हाडून दिलें. तेन्ना पंचायत सचिवान आमी दोनूय पक्षकारांक नोटीस धाडून पळोवणी करतले, अशें सांगलें.
ह्यान फुडें पंचायतीन कागाळदाराची वळख पटोवन कागाळ दाखल करून घेवची, असो थाराव ह्या वेळार भोवमतान संमत केलो.
हे खासा ग्रामसभेंत देशाचे प्रधानमंत्री नरेंद्र मोदी हांची तिसरे फावट पंतप्रधान पदार निवड जाल्ले खातीर आदले सरपंच रामचंद्र केरकार हांणी परबीं दिवपी थाराव मांडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
